O Cicciollâ 1930/E oscillasioin da sterlinn-a
| ←O vegio barcajêu | O Cicciollâ de E oscillasioin da sterlinn-a |
Vixioin di Cascié→ |
| lasciòu inalterâ a grafia do "Cicciollâ". |
Marotto
Scio Mego cäo, o l’è da ûn po’ de tempo
Che mi me sento gramo, ûn po’ indisposto,
Ho perso l’allegria: o mae contento
O deve avei cangiou proprio de posto.
Un giorno a pansa a me se vede apenn-a,
Tanto a l’è bassa e tanto a l’è sottì;
Conversasioin a fà cö-o fì da schenn-a
E scoexi o pà ca vêuggie scomparì.
Unn’ätro giurno poi, in te ûn momento,
A me se gunfia tanto da no dì,
Dûa come ûn balon, me dà tormento
E sorva tûtto a me fa scomparì.
Un faeto paigio o no m’è mai successo,
Doppo che porto a testa e che respio:
Mi gou digo de chêu e ghe confesso
Che me sento za stûffo e za avvilio.
In te sti movimenti me muggiè,
C’a l’ha ûnn-a serta dose d’esperiensa,
Quando l’ho molla e c’a me va inderè,
A perde o lûme dell’intelligensa,
Quand’a l'è dûa e grossa a va in delirio,
A me ghe fa de tûtto a questa pansa;
Scia me tasse sciortî da sto martirio,
Scia me daghe ûnn-a pûrga e ûnn-a speranza.
Mego
Sentì, brav’omo, o vostro o l'è ûn malanno
Che o no se pêu guarì con ûnn-a meixinn-a.
Pensè ciù tostu se, durante l’anno,
Avesci mai colòu.... quarche sterlinn-a!