O Cicciollâ 1930/Vixioin di Cascié
| ←E oscillasioin da sterlinn-a | O Cicciollâ Vixioin di Cascié |
A-a Campanassa→ |
| lasciòu inalterâ a grafia do "Cicciollâ". |
E grende gesta de sta vêgia Sann-a
de sèrtu sun sciurtìe de ’n ti Casciè,
carruggiu pin de vitta, cu scampann-a,
in tutti i modi, a soêu giucunditè.
Chi passeggia là de giornu,
in te ùe ciù sciatè,
u se mie ben dinturnu
pè schivà de carcagnè:
vagghe avanti cu attenziun,
ben miàndu cussu fà,
che, pê scorze de setrun,
u va a rischiu de sgruggià!
Osservandu in te bitèghe,
u sentià gente sbraggià:
— padrunetta, ancun ’na meza,
quattru pezzi de fainà. —
Tiandu sciù drìti
pê quellu caruggiu,
vedièi pesci triti,
carotte e fenuggiu,
spassine, fascinn-e,
carbun e savatte,
di cioi cun da spagu,
da peixe e patatte.
Vediei, per esempiu,
vixin a de sacche,
di massi de stuppa
pe fà de perrucche,
chè drentu gran usa
de questa ne fan,
perchè quexi tutti
cavelli nu gh’àn.
Vediei di galanti
che parlan cianin,
vedièi di figgieu,
che fan u.... pipin.
De donne maiè,
che taccan pumeli
in scià porta de casa,
scardando i furneli:
e poi lì sun lite
cu maiu arraggiou,
cu trova a burridda
ca sà de bruxiou.
A donna tacchigna,
A limpida donna,
ca veu raxiunn-à,
ciù forte do maiu
se mette a crià.
N’amiga a dumanda,
sgumenta, u perchè
de quellu burdellu,
cu pà da dannè:
ma un’atra, assuefeta
a quelli frangenti,
a spiega a vexinn-a:
se mustran i denti.
In pochi menuti,
in tutta a cuntrà,
s’ammuggia e vexinn-e
pe andà a cêtezzà.
Fra queste scenette
e u zoegu du lottu,
tra e resche di pesci
e u gattu marottu,
tra u Pippu cu cianze,
perdendu e braghette,
e a nonna che adaxiu
sarscise e casette,
se vive, se gode,
taggiandu cappotti,
mangiando berodi,
bevendo di gotti.