Lunaio Regiña 1888/Cos'o l'é o cholera?
| ←Ne-a rivëa de Ponente | Lunaio zeneize compilao da-o sciô Regiña & C. pe l'anno 1888 de Cos'o l'é o cholera? |
A-e donne farmaciste→ |
Cansonetta
O cholera o l'é ûn baccillo
Ch o l'é grosso comme ûn grillo
Da formaggio co-o pesîgo,
Ch'o sta li comme l'ombrigo
In ta tæra a fâ o pötron,
6A mangiâ pan a petton.
O cholera o l'é o spavento
De chi vive sensa stento,
De chi fà o bocca çernûa,
De chi tôsce, scracca e spûa,
De chi a forza d'imbroggiâ
12Mette insemme do dinâ.
O cholera o l'é a cöcagna,
O l'é o tócco in sciâ lasagna
Pe-i dottoî sensa cazann-e,
Pe-i collæn e pe-e sottann-e,
Pe gran parte di speziæ
18Che con poco fan dinæ.
O cholera o ne derîva
D'in ta röba mangiativa
Artefæta o zà stallïa
Da doveila cacciâ vïa;
E da-o vin manipolôu
24Con salnitro e môn pestôu.
O cholera o l'intra spesso
In ta fænn-a mëza gesso,
In te l'êuio de sezzamme,
In to lardo, in to salamme,
In ta carne de maxin
30Da toccâla co-i rampin.
O cholera o fa da baggio
In ta crosta do formaggio
Ch'o l'aspûssa de savatta,
De caçinn-a, de patatta,
De sarmôaxa, de scappin;
36Segge Sardo o Piaxentin.
O cholera tanto basta
Che ne-e fabbriche da pasta
O se scialla, o se repiggia
In te quella scorsoniggia
Che ghe mettan pe saffran
42Con dêuviâ do pëzo gran.
O cholera o no n'é stanco
De piccâ ne-o sûccao gianco
Che de marmao gremenïo
O pâ scinn-a ciù candïo,
Ciù lûxente e brillantôu,
48Ciù gûstozo e raffinôu.
O cholera o picca e o sbatte
Da chi mangia de patatte,
Da chi stà pe-i carôggetti
In te çærti mezzanetti
Donde mai no lûxe o sô,
54Che d'ammiäli fan orrô.
O cholera in te campagne
O g'accianta e sò carcagne
Pe ammazzâ l'agricoltûa
Co-a pellagra e con l'ûzûa,
Con l'arbitrio di patroin
60Che son pëzo che Neroin.
O cholera o se svilûppa
In ta nostra pövea trûppa
Che strosciâ da-a disciplinn-a,
E da-o stâ seia e mattinn-a
Rinserrâ drento in quartê,
66Pâ ch'a cazze de d'in pê.
O cholera o fà flagello
In te case de bordello
Che riçeìvan i pivetti
Pe poeì fäne di laddretti,
Di viziosi e di viziæ,
72Di figgiêu spregiûdichæ.
O cholera o l'intra in guanti
In ti gren caffè cantanti,
In ti mûggi d'Operette
Donde mostran e gambette;
E, creddeìme, o ghe dà zù
78In ta pövea zoventù!
O cholera o cöre in gïo
Pe addesciâ ciù d'ûn partïo,
Pe fâ nasce de gioxïe,
Do gran astio, de raoxïe,
Da continua divixion
84In ti membri da nazion.
Pe sanâ questa maotïa
Chi ne mette tanta puïa,
Ghe vorrieìva ciù giûstizia,
Ciù bon chêu, meno malizia,
Meno famme de dinæ,
Ciù concordia ne-e çittæ.