Lunaio Regiña 1888/A-e donne farmaciste

Lunaio zeneize compilao da-o sciô Regiña & C. pe l'anno 1888 de V.
A-e donne farmaciste

A-e donne farmaciste (*)

Scherzo

Doppo piggiôu a laurea
Metteive sciù speziaia,
E con contâ de frottole
Da l'arba all'Avemaia,
Nell'ægua fresca e limpida
Da pompa e do bronzin
Poi ricavæghe i reçipi
In bravi marenghin.

2.
Con pacchettin e scatôe^[sic]
Careghi d'etichette,
Con barbari vocaboli
Ne-i vasi e ne-e brocchette,
Sganzie, veddrate gotiche,
E spëgi e caregoin,
Accapparræve o pûbblico
Di fûrbi e di mincioin.

[p. 35 modifica]

3.
Pozioin, decotti e pillôe^[sic]
De peìxe e recanisso,
Gesso e caçinn-a vergine
Vendeili a prexo fisso;
E pe acquistäve ûn merito
Co-i posteri lonten,
Alzæ de prëxo i generi
Che mandan a Staggen.

4.
Vegnî pinn-e de boria,
Metteì sciù ton nasale,
Un'andatûa magnifica,
Un'äia dottorale;
Ne-e sacristie, nei circoli
Fæ sciäto e ramaddan,
E comme indispensabile
E gente ve stimian.

5.
Ei fæto ûn passo serio,
Un passo da giganti,
E posto ne-a politica
Aviei d'aoa in avanti
E se a Montecitorio
No mettiei fito i pê,
A-o nostro Municipio
Brilliei pe conseggiê.

6.
Donne, zà ch'ei a gloria
D'êse speziæ da mëgo,
No me mettei ne-o nûmero
Di condannæ, ve prego!
Ammiæ de no fä sbaglio
De döse in ta pozion
Se ve consacro e dedico
Duï versci d'occaxion.

V.