Cava in to remoin 1930/ANNIVERSAIO

by Gioxeppe Cava

←O libbro da sêu Primma Comenion

In to remoin de Gioxeppe Cava Anniversaio

A çighaea d'öu→

ANNIVERSAIO

29 marso 1923.

Sett'anni son passae, povea piccinn-a,
da quella nêutte che no so scordâ;
sett'anni giûsti anchêu, che a têu testinn-a^[1]
l'ûrtima votta a-o sen me son serrâ.

Ö tempo che o scançella tante penn-e
ûn barsamo per mi no l'ha trovôu;
sett'anni! e comme allôa me tremma e venn-e^[2]
e ûn gruppo chí in ta gôa me leva ö sciôu.

Ah, se pöresse armeno liberame
da 'sto dolöre immenso e senza fin
vegnindo a tî d'arente a repösame^[3]
da-a lotta a denti streiti cö destin;

là in to refûggio estremo döve taxe
ogni contrasto, ogni odio, ogni rumô,
me arreversiae pe sempre in ta gran paxe
da taera consacrâ da-o nostro dô.

29 marso 1930.

1. Anchêu: oggi.
2. Allôa: allora.
3. Arente: vicino, accosto.