Cava in to remoin 1930/O LIBBRO DA SÊU PRIMMA COMENION
| ←Illûxion | In to remoin de O libbro da sêu Primma Comenion |
Anniversaio→ |
Ö LIBBRO DA SÊU PRIMMA COMENION
O m'é vegnûo pe-e man veiseia tardi,
ö libbro da sêu Primma Comenion,
ancon fasciôu da lë con i riguardi
e a fede de l'ingenua divözion.
Çercavo çerte carte e in to trövâlo
o me s'é misso ö chêu a remesciâ,[1]
g'ho daeto ûn lungo baxo e in to posälo
l'aveiva quarche pagina bagnä.
Ho cento, e in mezo a-e lagrime ho sentio
passame sorva a-a fronte ûn dôçe sciôu,
förse a sêu bocca, allôa, m'ha restituio
ö baxo che in sce o libbro g'ho posôu.
L'ëa ûnn'illûxion, l'é veo; ma se a vegnisse
quell'ombra bella ûn giorno de lasciû,
insemme co-e meistrae in to libbro misse[2]
a ghe tröviae e mae lagrime in deciû![3]