Ro Chittarrin/Ro scorroççamento de Gian Rua camallo da carbon
| ←Maxin sfœuga re sò peñe sotto ri barcoin de Minetta | Ro Chittarrin, o sæ strofoggi dra muza de Ro scorroççamento de Gian Rua camallo da carbon |
Dialogo tra ra moære e ra figgia→ |
DE GIAN RUA
Camallo da carbon, con
MINETTA MININI
Minetta, no gh'è mondo,
Per mi zà ti hæ finío.
Va via, te diggo addio.
No me stâ ciù à çercâ.
Ti fæ papê con Giacomo,
E mi m'agguanto à Tonia;
E sì no mondo nespore:
A l'è patt'e pagâ.
2
Subito che t'ho visto,
No nego, e ro confesso,
Che fin à rosto, à lesso,
Saræ andæto per ti.
Ma in giro comme un ghindaro,
Comme fœugge dell'arbora,
Se ti ti cangi genio,
E così façço mi.
3
Mille votte t'ho dîto,
Che in trappa ti me stagghi,
E che ti non ghe vagghi;
Ma ho buttao via ro sciao.
Pù tanto là int'ro fondego.
T'ho visto de Sozzeivera
À beivetene uñ'amora
Con Giggio ro scciappao.
4
À ra mattin per tempo,
Faççando gibriella,
T'ho visto fâ dra bella
Con quello scarlafon.
Se poessan parlâ libero
Re caze, ville, ri ærbori,
Direivan senza dubio,
Direivan ch'ho raxon.
5
Donca se te ghe cianto
Giusto sciù ra parmæra,
No me stâ à fâ bombæra,
Con dîme traditô.
Che mi ghe prego un cancaro,
Chi ghe rozigge o stœumago,
À chi desfè ro callaro
Dro nostro primmo amô.
6
N'occôrre che ti cianzi,
Che attorno ti me giri,
Che pe ri tò sospiri
Non me lascio recræ.
Non sento re tò lagrime,
Non veggo re tò smorfie,
Son sordo à re tò smanie,
Re oregge son tappæ,
7
Non ghe sperâ, Minetta:
Me scordo tutt'affæto
L'amô chi gh'è zà stæto,
Me scordo i nostri dì.
Ti và con ro tò Giacomo,
Mi vaggo con ra Tonia.
Minetta, no gh'è mondo,
Zà l'è finía per ti.