Rime diverse in lengua zeneise/Per un orbo
| ←Quello proverbio dixe ben, per Dé | Rime diverse in lengua zeneise de Per un orbo |
Capitoro→ |
| acento grave = vocale curta - acento aguçço = vocale longa; clicca o nummero da paggina pe 'n rafronto co-a transcriçion diplomattica |
Per un'orbo
Se ben n'han luxe o Donna i oggi mé
Che troppo agro acidente l'amortà;
Ni pon vei ri miracori che Dé
Tutto ro giorno, in questo mondo fa
Quella virtù, che così larga in Cé
Ve dè natura, quando a ve formà
Tanta luxe me porze all'intelletto,
Che de vui posso vei ro ben perfetto.
2
Perche de rero un'annimo gentí
Per ornamento ha moé brutta figura,
E s'atramenti segue, o se puoe dí
Che quello sea deffetto de natura.
L'ascoso che da mi se fa sentí
Ro descoverto ha de mostramme cura(?)
Si che s'odo de voi l'ascoso ben
Veggo quello chi pá, ni chiu ni men.
3
Per questa via, mi chi son orbo, posso
Giudicá sannamente de coró
E dí quando me fere, e luxe adosso
Dro vostro bello viso, ro sprendó
Che quanto è da ro pichieno, a ro grosso
E da ro chiù cattivo, a ro megió
Tant'è de defferenza a quella luxe
Da l'atra chi ro giorno in terra aduxe.
4
E ve crei che non sacchie monto ben
Che bella como vui donna no vive,
E che tutto l'honó se ve conven
Che lengua possa dave, o penna scrive;
Che per vui soramenti Amó sosten
Ro regno, e da re vostre luxe vive
Piggia quella virtù con che da puoe
Tent'annime o l'accende, e tenti cuoe.
5
O quanto me stupisso, e maraveggio
Quando ra mente drizzo, o donna in vui,
E re bellezze vostre ben cerneggio
Chi ve fan così rera chì tra nui
A ra lunna, a ro só no v'assemeggio
Che varei meggio assé de tutti doi,
Ma come è dritto, e raxoneive, a quella
Bellezza chi de ló ve fè chiù bella.
6
Da questo nasse, annima mea, che tenti
Annimi dexirosi han per costume,
De xvorá come oxelli tutti quenti
A ro vago sprendó dro vostro lume,
Donde arrivé tra quelli lampi ardenti
Con ra vitta meschin lassan re chiume
E fan quello nessou chi fa ra seira
Ra porcelletta intorno a ra candeira.
7
E veramenti se chi troppo vuò
A ra spera dro só dritto mirá
De sorte o s'abbarlugha che dapò
Ro gianco, neigro a ra sò vista pá.
Ra vostra viva luxe ro mé cuò
Chi può ro scuro inferno chiero fá
Chi ardisse oggio ben san de mirá chie
Orbo no restereiva como mie?
8
Con l'annimo per zò netto e purgao
Ogni corpo mortá v'honore, e inchinne,
S[']o desira per vui fasse beao,
E vei cose dro Cé belle, e divinne.
A re qué mi son za tanto accostao
Anchora che attaston ro pé caminne,
Che veggo bello, e chiero ro Pareiso
Per quella via c'hò da vui Donna impreiso.
9
Veggo mirando in vui mille angeretti
Unna bella rionda fá per ére
Che puoeran tenti ricchi barassetti
Davanti a ra grandezza dro Dé Poere,
E cantando fra ló ri figgioretti
Unna musica fan con si doce ere
Che a poreiva allegrá quello che tenti
Agni, a ro mondo stè fra doggie, e stenti.
10
Veggo tent'atre cose che à vorrei
Rasonave de quelle a compimento,
Sareiva de besogno à mé parei
Ch'atro no fesse moé per agni cento.
Ni poreiva à ra fin tanto savei
De zò che veggo de vui stella, e sento;
Che no fosse l'effetto assé chiù grande
De quanto poesse ra mé lengua spande.
11
Basta che come in Cé fra i atre luxe
Quella se vè dro só chiù viva, e bella,
Perchè la sù no soramenti a luxe
Ma d'esto mondo, in questa parte, e in quella,
Così ra vostra vaga e chiera luxe
Chi sprendó dona a l'unna e l'atra stella
Prima è fra queste basse come in Cé
Tra re cose divinne è primo Dé.
12
Ma perche ro parlá de poco peiso
Che d'un soggetto così grande fasso
Poreiva, annima cara de Pareiso,
Tirave in quarche luoego scuro, e basso,
Meggio è che taxe, che da mi repreiso
Me tegne, per no vei che in un stromasso
Atri addoté ch'a mi de meggioi dote
Ro stí, ra penna, e ro papé ghe bote.
13
Soramenti dirò può c'ha vossuo
Amó fave de mi libero don
E che per honorave anchon nassuo
E per amave, e per servive son,
No me voggié mostrá ro cuò si cruo
Da fame caze in terra a rubaton,
Anzi acetté ro me servixo in grao
Che posse fame in vui tutto beao.