Rime diverse in lengua zeneise/A madonna Peretta Scarpa (3)
| ←A madonna Peretta Scarpa | Rime diverse in lengua zeneise de A madonna Peretta Scarpa |
A ra mesma→ |
| acento grave = vocale curta - acento aguçço = vocale longa clicca o nummero da paggina pe 'n rafronto co-a transcriçion diplomattica |
Bella Scarpa de cuo duro, e crudé
Per Dé, che l'è ben steta carrobinna,
E l'è steta per Dé carravanchinna
Che in villa andeta ve ne sei l'atré.*
Ni a Steva vostro havei pù dito: adé.*
A troppo crua, e bella Peretinna
Mi chi v'hò feto dro mé cuo reginna
Donca ingrata, fuzí si vorenté?
Ma se ben me fuzí, como oxeletto
A ra montagna fuze, e vora via
Se a Zena o sente trá quarche schiopetto,
Mi con i are dra mente e fantasia
Donde sei, presto arrivo, ve prometto
Che donde ponze Amó curt'è ogni via.