Piaggio M. - Poesie 1846/Varietæ/E Convenienze
| ←No ghe n'è ciù ûn dio de netto | Poexie de E Convenienze |
Avviso a-e Mammæ→ |
| (ediçion Pagan - 1846) |
Per saveì stâ in Societæ
Bezêugna ëse ben armæ
De riguardi, convenienze,
D’attenzioîn, condiscendenze,
L’amô proprio lûxingando
De chi se va praticando
Con de poetiche licenze,
Cioè, per fâne a tradûzion,
Ese meistri ne-a finzion,
Che a sccettessa a no conven,
E a prodûe ciù mâ che ben.
Parlo contro a mæ conscenza,
Perchè a finze no son bon,
Ma ho imparôu dall’esperienza
A dî e cöse comme son;
Perchè ho visto, che a chi manca
O talento co-a bravûa,
Ghe sûpplisce a faccia franca,
A gran lengua e l’impostûa,
E subacca sempre o dotto,
Che modesto o stà de sotto.
Questo chi o l’è o gran segretto,
Che in t’ûn nêuvo libbro ho letto
Aa françeize ben ligôu
Dell’Autô... (me l’ho scordôu)
Co-e parolle a fêugo indoæ,
Chi no costa guæi dinæ,
Eo l’ha ûn smercio coscì grande,
Coscì vivo in tûtte e bande,
Specialmente in te Çittæ,
Che ve baste che zà son
Aa millexima Edizion.
E coscì per passâ a lûnn-a
Vêuggio dive qualchedûnn-a
De infinite convenienze
Che ghe vêu per fâ fortûnn-a,
E acquistâ de ricorrenze,
Che ciammiö cö nomme vëo
Furberie del Galateo;
Ma ghe vêu o stêumago bon
Per collâle e digerîle,
Perchè mettan da gran bile,
E fan troppa indigestion.
Se n’eì vêuggia, stæ a sentîle,
Basta che no v’inversæ.
Per exempio: ve trovæ
A ûn disnâ?... in conversazion?...
Se no seì dâve do ton
E conosce a convenienza,
Un Brevetto v’accattæ
De Mincion per eccellenza,
Passæ dunque pe ûn Lorbasco,
O pe ûn Collegian riveasco.
A ûn disnâ lodâ doveì
Tûtto quello che veddeì
Prinçipiando da-o salamme,
A-o cattivo, dîghe bon,
(Con magara moî dä famme)
Incensâ o vostro Anfitrion,
Fâ i onori co-a vexinn-a
Con servîla d’ægua e vin,
E parlâ co-a bocca pinn-a
Pe angosciâ e stordî i vexin,
Ve poeì finn-a all’occorrenza
Imbriægâ per convenienza.
Lodæ sempre, verbi gratia,
D’ûnn-a brûtta a bella grazia,
D’ûnn-a vegia a zuventû,
D’ûnn-a sciolla a gran virtù;
Êuggi belli dî a ûnn-a stramba,
A chi è storto bella gamba,
A ûnn-a zemba bello fûsto,
A ûn tanardo ommo de gûsto;
E coscì via discorrendo,
Comme o libbro va dixendo,
Tûtte e cöse che veddieì
Quando gh’intra a convenienza
Aa reversa sempre dieì,
Con saveì fâ all’occorrenza
Ben da sordo, da orbo e mûtto
E da commodin in tûtto;
Ma!... politica e prûdenza;
Per exempio, no parlæ
De salûte e robûstezza
Con chi ha perso a sanitæ
E a chi è pin de debolezza;
No vantæ e vostre ricchezze
Con chi è poveo diventôu,
Nè parlæ mai de grandezze
A chi vive limitôu;
No mandiæ coi granattin
De parlâ de pan piccin
De raccolte perse fêua;
E de sessia, e de gragnêua
A-i mercanti d’êujo e vin.
No parlæ d’epidemie
Mai co-i mëghi, o de maottie;
De meixinn-e co-i speziæ,
E de liti co-i dottoî;
Nè de religion ciarlæ
Con chi no ne vêu senti;
Soprattûtto all’ûsûrajo
No stæ a fâ da miscionajo,
Dunque o spella all’indoman
Vivi a rëo quanti ghe van;
No stæ a fâ nisciûnn-a critica
A-o fanatico in politica,
Dæghe sûbito raxon,
Lasciæ fàghe paxe e guæra
E spartî a so moddo a tæra,
E ciammæo politicon,
Che vegnindo l’occorrenza
Ghe sä a vostra convenienza.
Se per caxo v’accorzesci
(E ghe n' è de questi nesci!)
Che qualcûn mai se stimasse
Pesso grosso diventôu
Pe aveì dæto fêugo a-e strasse,
Perchè o diàscoa o l’ha aggiûttôu,
No rendendo ciù a-o salûo
Di sò amixi e andando dûo,
Con voeì fâ da necessajo!....
Adulæo per convenienza,
Ciammælo ommo straordinajo,
Dæghe fin dell’eccellenza,
E soffrî (se gh’eì pazienza)
Questo nêuvo sûperbion
Che o ve dä a so protezion!...
Se intoppæ de quelli tali
Tappullisti ûniversali,
Galantommi pe impostûa,
E birbanti de natûa,
Ficcâ naso dappertûtto
E che vêuan saveì de tutto,
Fæghe mille complimenti
Sorve i rari so talenti
E a so gran filantropia,
Adulæli ciù che poeì,
Dunque, cäi, no ne sciortieì
Senza un pö d’ægua buggïa,
Chi sa manco se a schivieì!...
Ma lascemmo questa gente
Per parlâ generalmente.
Camminæ o primmo dell’anno
Comme matti pe-a çittæ
Pe andâ a dâ o bon cappo d’anno,
Affermæ, abbrassæ e baxæ
Tûtti quelli che incontræ
Fæghe augûrj e complimenti
Con proteste senza fin
(Che se porta all’aja i venti
O se perdan per cammin).
Montæ in questa casa e in quella
Per lasciâghe ûnn-a cartella,
E per fâ a cösa ciû mëgio
Attacchæghela da ûn spëgio
Perchè reste tûtto l’anno
Sempre lì o primmo dell’auno;
Fæve notta in to Lûnajo
Quando quello giorno ven
Natalizio, anniversajo
Pe andâ a fâ a ciù conven,
E vestii tûtti attillæ,
I salamelæcche ûzæ;
Ma v’avverto d’ûnn-a cosa,
Perchè a l’è pericolosa,
Ne-i compleannos no parlæ
Mai co-e donne dell’etæ,
Ma desfæveghe d’affetto,
Presentæghe ûn gran massetto
Con di mûggi de poexïe
Tûtte pinn-e de böxïe
Senza rimma, nè raxon
Pe acquistâ a sò protezion,
Poeì fin dîghe all’occorrenza
Qualche bella impertinenza,
Ma avvertî de batte pe atro
O mea culpa in pëto a ûn atro,
Dunque.... dunque per prûdenza
Aoa è tempo de finî,
Che se voëse tûtto dî,
Fæ scappâ a-o Lettô a pazienza
Per caxon da convenienza.
Chi vêa imprende a vive a-o mondo
Se provvedde sto libretto,
Tanto ciù che gh’è o segretto,
Chi o sa lëze ben a fondo,
De fâ scagge, e de vegnî
Letterati a ciù no dî,
D’acquistâ dell’importanza
E de fâse rispettâ......
Mi confesso a mæ ignoranza,
No ghe l’ho sapûo trovâ,
Coscì son sempre restôu
(Ben contento che ne son)
Quello ch’ëo, finindo in on...
Perdonæ, se v’ho seccôu.