Piaggio M. - Poesie 1846/Varietæ/Avviso a-e Mammæ
| ←E Convenienze | Poexie de Avviso a-e Mammæ |
A Virtù de Le-Roâ→ |
| Pagan, 1846 - za pubricâ into Lunaio Regiña do 1835 |
AVVISO A-E MAMMÆ
Raxonetta d'un Figgiêu da nascion
Donne cäe, stæme a sentî,
Che ve conto ûn pö l’Istoja
Do mæ nasce, vive e moî
Per tegnîvela a memoja.
Son nasciûo in mëzo ä fortûnn-a
Da ûnn-a bella e ricca moæ,
Delicâ, de bonn-a lûnn-a,
E sentimentale assæ.
Êutto meixi e ciù son stæto
Da mi solo ne-a so pansa,
E con lê son sempre andæto
In qualunque circostansa;
Mai de ninte me mancava!
Tûtto aveivo sensa fallo,
In carrossa; a-o Teatro andava,
A ballâ... e finn-a a cavallo!...
D’ogni cosa che me fesse
Vegni côæ, Mammà meschinn-a
Tutt’a voeiva che mi avesse,
Fosse læte de gallinn-a!
Finalmente a se dè a penn-a
D’appartôime con gran stento;
Ma de vedde a lûxe appenn-a,
Meschin mi!... sûbito ho cento:
Giando i êuggi, me son visto
In te grinfie d’ûnn-a donna
Vegia, affiâ, d’ûn sguardo tristo,
Che a ciammavan Bonnadonna;
A m’ammiò, e bûttando un crio:
Masccio! masccio! a disse! scialla!
Poi toccandome c’ûn dio
A me deslogò ûnn-a spalla!..
A me cacciò là in t’ûn canto,
Ch’ëo ciù neigro che o carbon,
E a me fesse çerto incanto
Con schissâme o scignoron!
Sciortì a mëzo ûn co-i speggetti,
Berrettin con farbalà,
Mastûgando fenoggetti,
E l’ëa questo mæ Pappà;
O m’ammiò d’in lontananza
Con çert’aja sorprendente...
Tûtt’assemme intrò ne-a stanza
Unn’infinitæ de gente.
Ho creddûo che m’insordissan
Dä caladda che façeivan,
E che o naso me rompissan,
Perchè tûtte tiâ me o voeivan.
Tanto streito me fasciòn,
Che no poeivo ciù respiâ....
Testa e collo me ligòn,
Che me son sentïo stranguâ!...
Doppo aveìme per mëz’öa
Struffuggiôu comme ûn strasson,
Me portòn da ûnn-a Scignöa
Sotto ûn ricco padiggion;
A doveiva ëse a Mammà,
Che ûn gran baxo a me cioccò
Fêua da testa, che o Pappà
Con raxon o resätò.
Poi m’han misso in t’ûnn-a chinn-a
Per locciâme ogni pittin
C’ûnn-a grossa bûgatinn-a
D’êujo e sûccao per tettin!...
Steì vint’ôe coscì, e creddeivo
De creppâ da-o gran languî:
Cöse ho mai fæto! dixeivo,
Che me fan tanto soffrî!...
Tûtto in galla m’han vestïo
Per portâme a battezzâ,
Oh che freido ho mai patïo!
Me creddeivo de giassâ!...
Cianzeì tanto, che m’arvivo:
A-o ritorno poi m’han dæto
Un potente vomitivo,
Che collâ a forza m’han fæto!
Me fèn giâ per tûtta a Veggia
Comme ûn gatto in t’ûn çestin
A mostrâ pe ûnn-a mäveggia,
E per fâme dî: meschin!
Piccò a porta finalmente
Unn-a pæsta de Paisann-a,
Rossa, e ardïa comme ûn serpente,
Con medaggia e gran collann-a:
L’è chi a Mamma! tûtti criòn;
A l’intrò, a bevè e a mangiò,
A lê poi me consegnòn,
Che ben lunxi a me portò.
In carrossa son partïo,
Che testæ a me fè piccâ!...
O Sô in Lion m’ha brustolïo
Pe-e montæ c’ho dovûo fâ!...
Me portava ûn dito o Tatta;
Arrivæ sotto ûn sûjêu,
O ne dè de mi ûnn-a patta
Dove gh’ëa ûn atro figgiêu;
Questo, ûn so Rampollo o l’ëa,
Che per morto fen passâ!...
De sei meixi, giano in cëa,
Tanto grasso da scciûppâ.
Ah! mai ciù ghe fosci andæto!
Che compagno g’ho trovôu!
Indiscreto; mâ assuefæto,
Che i mæ drïti o s’ha ûsûrpôu!...
Mi cianzeivo, e lê tettava,
E fin ch’o n’aveiva vêuggia,
Tûtto o læte lê piggiava,
E mi incangio ûn pö de schêuggia!
Questo è ninte, mi dormiva
In ta paggia, e lê in te ciûmme!
Lê respiava ûnn’aja viva,
E mi soffocôu da-o fûmme!...
Questo è ninte!... oh çerte moæ,
Ricche e povee senza coêu,
Che a de Mamme abbrettio dæ
I meschin vostri Figgiêu,
Stæ a sentî, imparæ, e stordî!
Unn-a nêutte, questa Stria
A me fè con lê dormî,
E son morto d’asfixia!!!
No cianzeì però a mæ morte,
Nè de mi aggiæ compascion,
Perchè a ciammo anzi ûnn-a sorte,
Staggo assæ ben dove son.