Piaggio M. - Poesie 1846/Varietæ/A Virtù de Le-Roâ
| ←Avviso a-e Mammæ | Poexie de A Virtù de Le-Roâ |
O Tabacco de Donne→ |
| (ediçion Pagan - 1846) |
Treì Amixi, e ûnn-a Comâ
Se n’andòn in posta a fâ
A Milan Carnevalon.
Fra e provviste che portòn
Gh’ea træ o quattro bottiggette
De Le-Roâ co-e so etichette
Pûrgativo e vomitivo,
Con scigilli a fêugo vivo
Che ficcòn dentro e borsette
Da carrossa, e camminando
Mastûgando, e ciarlattando
Finalmente s'addormìn;
Quando fùn passôu Pavia
Incontròn i assascin;
Là gh’e i Laddri! o vettuîn cria
Lö se sveggian spaventæ,
E se veddan circondæ
Da cottelli, e carrubbin,
E da mostri che sbraggiavan
Dinæ o vitta! e minacciavan.
Vegnì ä bella e convûlscioîn,
Legnòn primma o carossê,
Ghe ligòn poi moen e pê,
Mëzi morti da-o spavento,
Te i ligòn comme agnelletti,
Ghe piggiòn l’öu, e l'argento,
Co-e buttigge de Le-Roâ,
Che credendolo vin bon
Tûtto affæto se o sciûgòn.
Da lì a ûn pö aggiûtta chi pêu,
Favan mille contorscioîn,
Chi se tiava zù i cäsoîn,
E chi regittava o coêu;
Ciù nisciûn rëze se pêu,
E fra i spaximi, e e giastemme
Cazzèn tûtti in tæra assemme
Comme morti; quelli allöa
Sempre lì co-a morte ä göa
Se fèn animo, e slighæ
Da Madamma rinvegnûa,
Che creddeiva d’ëse in pûa,
Presto presto son chinæ
D’in carrossa, desligòn
O Vettuîn, se repiggiòn
Tali e quali i so dinæ,
Fèn in tocchi i carrubbin
Con i stili di assascin,
Che cacciòn in t’ûnn-a fossa,
Rimontòn fito in carrossa,
E, ciù giani che o saffran,
Arrivòn mucchi a Milan
Vivi in grazia de Le-Roâ,
E poi dixan ch’o fa mâ!