Piaggio M. - Poesie 1846/Esopo Zeneize/A Sigaa e a Formigoa
| ←A Mosca e o Bêu | Esopo Zeneize de A Sigaa e a Formigoa |
A Figgia e l'Erba Sensitiva→ |
Unn-a Sigaa chi aveiva
Ne-a Stæ sempre cantôu,
Mangiando cose a voeiva,
E dove a voeiva sghêuôu;
Sciûsciando a tramontann-a,
A l'ëa lì per scciûppâ
Ridûta senza tann-a,
E ninte da mangiâ;
A l'andò a batte ä porta
D’ûnn-a Formigoa, criando,
Vexinn-a caa, son morta....
Caitæ.... me raccomando....
Prestime un fregoggin
Da roba, che ti g’hæ,
Allöggime un pittin
Finn-a che vegne a Stæ,
Che te prometto, caa,
De date o frûto e o costo,
In fede de Sigaa,
Primma che vegne Agosto.
A ghe rispose, amiga,
Te contentiæ voentëa,
Ma mi n’impresto miga,
Nè fasso a Locandëa;
Prinçipia inverno anchêu,
Ho ûnn-a provvista affiâ
Per mi e pe-i mæ figgiêu
Con economizzâ;
Dimme ûn pittin, per cose
Sta Stæ ti no pensavi
Comme mi a queste cose?
Allöa cose ti favi?....
Tegnivo o mondo allegro,
N’ho fæto che cantâ....
Brava! me ne rallegro,
Aoa ti pêu ballâ.
A ti asci, ommo pötron,
Perdigiorni e spenscierôu,
Da Sigaa (se ti no cangi)
O destin t'è preparôu.
