 |
Questa pagina a no l'è stæta corretta. | |
FOA XIX.
Unn-a Mosca de Stæ, stanca e affannâ,
In scë corne d’ûn Bêu a s’andò a pösâ,
E a ghe disse: se mai te peizo troppo
Dimmeo, che me ne vaddo de galoppo;
Sciolla! rispose o Bêu, ti me fæ rie,
E chi saveiva che ti fosci chie?
Quanti nesci gh'è a-o mondo, che ghe pâ,
Scibben che son vescighe, de pezâ!
Unn-a Sigaa chi aveiva
Ne-a Stæ sempre cantôu,
Mangiando cose a voeiva,
E dove a voeiva sghêuôu;
Sciûsciando a tramontann-a,
A l'ëa lì per scciûppâ
Ridûta senza tann-a,
E ninte da mangiâ;
A l'andò a batte ä porta
D’ûnn-a Formigoa, criando,
Vexinn-a caa, son morta....
Caitæ.... me raccomando....
