O Cicciollâ 1930/I Cavae zelanti
| ←Emigrazion in America | O Cicciollâ de I Cavae zelanti |
Unna strana vixion→ |
| lasciòu inalterâ a grafia do "Cicciollâ". |
(A revista da Çittae da O Canocciale de Savon-na pe-o 1845)
Gh’è de stradde che son pinne
De pollastri e de gallinne,
D'êuve fresche, de formaggi,
Fighe secche, meje, erbaggi
E atre cose de sta sorte.
Oh lì scì che tegnan forte,
Che i cavae son tutti quanti
E prontiscimi e zelanti!
Gh’assegûo ch’ogni mincion,
Ch’o vêu fâ contravvenzion,
Piggia subito o beschêutto!
Chì pellûccan un rechêutto,
Là spaventan con un sbraggio
O villan ch’o l’ha o formaggio;
Da sta parte se descrêuve
Unna corba pinna d’êuve:
Da quell’atra se gh’affaera
A panea ch’a sta pe taera.
Lì unna donna a se tapinna:
« Sciâ me dagghe a mae gallinna ». —
« L’ho piggiâ in contravvenzion ». —
Là un villan se mette a criâ
Con di sbraggi da fornâ:
« Caporale, caporale,
« Sciâ me dagghe o mae cappon! ». —
« O l’è incorso ne o penale ». —
No l’è véa che lì gh’è a speiza
Che se fasse qualche preiza?
Ma de ciasse e di caruggi
Pin de taera e de stroffuggi....
O da stradda chi è desfaeta.
Per e cose de sta faeta.
Come saiva carettoin,
Faeri, balle e bombe rotte,
Se ne cûran i mincioin,
E chi è aspaerto se ne f....