O Cicciollâ 1930/Unna strana vixion
| ←I Cavae zelanti | O Cicciollâ de Unna strana vixion de Françesco Pissorno |
Passeggiata in çittae→ |
| lasciòu inalterâ a grafia do "Cicciollâ". |
Unna strana vixion
(A revista da Çittae da O Canocciale de Savon-na pe-o 1847)
L’ëa d’Agosto, quando ä nêutte
Se stà un pesso in scïa terrassa,
E sentivo a Campanassa
Ch’a sûnnava mëzanêutte.
S’ammortavan pe’ a çittae
I economici fanae;
Gh’ëa unna calma ûniversale,
Un scilenzio generale.
Non se fava ciû sentî
Fêua, che i grilli cantadoî,
O un maoxetto chi vegniva
A treppâ un pittin co-a riva;
E in sciö mêu de quando in quando
Quarche notta de violin
O de flauto, che stonando
Soavemente s’accordavan
Con de raene che provavan
O so amabile voxin.
Tutte e stelle, scintillanti
Comme punte de diamanti,
Se vedeivan parpellâ
Sorve i monti e sorve o mâ.
In sce un çê bello e spassôu,
Dove no’ ëa nûvea nisciûnna,
Là da-e parti de Lavagna
Tiava fêua frattanto a lûnna
Un nasin rosso affugôu,
Comme l’è un peveón de Spagna;
E, ne o mentre ch’a montava,
Primma o mâ s’inargentava,
Poi ben presto a coloriva
Cên e monti in generale.
Mi per caxio me godiva
Quella vista da-o barcon
Ed aveivo per fortûnna
O mae bravo canocciale.
M’è vegnûo a tentazion
D’appuntalo contro a lûnna,
Per ammiâ se ghe scrovivo
O veridico motivo
De belliscime avventûe,
Di accidenti scingolari,
Che sûccede a carte scûe
Chì in t’i paixi sûblûnari.
Voî saveî, e tutti o san,
Che de stoppe che se fan,
A raxion a se pêu scrêuve
In t’i inflûsci che ne cêuve
Zû dä lûnna in scio cappello.
Ho vosciûo dunque tentâ
De scrovighe o nostro mâ:
Ma veddieî che son restôu
Propriamente mincionôu.
Nondimeno ho visto un monte
Tûtto faeto de vescighe;
E ne sghêuava da lontan
Ciû che zimme da un vulcan.
Seî che Ariosto o e vêu ciammâ
Monarchie e coronne antighe;
Ma o l’ha tiôu a indovinâ.
Mi co-a lente gh’ho scovaerto
Verso o fondo un’iscrizion
Che a presenta o moddo çaerto
De trovâne a spiegazion.
Son proggaetti de çittae?...
Nint’affaeto.... Indovinae.
Son proteste e paroloin
Che imbarlûgan i mincioin.
E ho distinto co-e mae lenti,
Scriti in mëzo a ûnna gran prìa,
I caratteri seguenti:
Patrio amô, filantropia[1].
Mentre estatico l’ammìo,
Addio bella, ch’ho finìo!
Sciorte fêua un nûvolon
E a-o momento, pe’ sfortûnna,
O me crêuve tutta a lûnna....
E mi saero o mae barcon.
- ↑ Per comprendere e giustificare quest’uscita del P. Pizzorno, si tengano presenti le condizioni spirituali d’Italia in quell’ardentissimo anno 1847.