O Cicciollâ 1930/Glorie de Savonn-a

O Cicciollâ de Feipo Noberasco
Glorie de Savonn-a de Feipo Noberasco (1855-1935)

lasciòu inalterâ a grafia do "Cicciollâ".

Glorie de Savonn-a

In sce-a tôre do Brandale,
Che a l’ha nomina immortale,
Quando o sêunna a gran campann-a,

Se remescia tûtto Sann-a:
Cose a dixe? Cose sento?
Cose o l’è st’avvenimento?
Se a campann-a a sêunna a gloria,
A l’è voxe de vittoria;
Quando a Patria a l’è in gran festa,
A campann-a lesta lesta
A diffonde l’allegria
Co-a ciù splendida armonia.
Quando a Patria a l’è in sgomento,
A l’ha ûn sôn ch’o pä ûn lamento,
A pâ a voxe d’ûnn-a sêu,
Che a l’arriva proprio a-o chêu;
A pâ a voxe do Segnô
Che o concianze o nostro dô!
Se a dovesse mai sûnnâ,
Se a dovesse mai cantâ
Tutti i fasti gloriosi
Tutti i caxi dolorosi
De sta cä nostra çittae,
Manco ûn anno o ghe bastiae.
A cantieva i nostri vegi,
Lindi, sccetti come spegi,
Che, vei tipi de onestae,
Ean da tûtti celebrae:
E che inzegni, proprio çimme!
Scritto han libbri in prosa e in rimme.
Commerciavan grandemente
Da levante e da ponente,
E in sce-o mâ i nostri mainae
Dappertûtto ëan rinomae,
E pe-o loro gran bon chêu
Ben vosciûi fin da-i rissêu.
Che se aveivan di nemixi,
E con tanto de barbixi,
I valenti nostri poae
L’han battûi e derenae;
Ne voreivan fracassâ,
Ma son morti in mëzo a-o mâ.