O Cicciollâ 1930/Savonn-a
| ←Glorie de Savonn-a | O Cicciollâ de Savonn-a |
A mosca→ |
| lasciòu inalterâ a grafia do "Cicciollâ". |
Savoneixi, sciù cantae
E grandesse da çittae:
Son vee pagine de gloria
E degniscime de storia.
Nu se sa per documenti
Chi n’ha faeto i fondamenti;
Ma a l’è molto rinomâ
Fra e antighe e celebrâ.
L’han descrita in prosa e in rimma.
Da Ligûria quaexi a primma:
Patria vea de onesta gente,
Sempre dïne ben se sente.
Ammiae ûn pö che bello çê,
De ciù belli o no ghe n’é:
Miae che splendido orizzonte
Là da-a valle, là da-o monte,
Che bellessa, che splendô
O ghe versa o Creatô!
Da ogni parte mi ghe sento
Armonioso un vëo concento.
L’äia chi salùbre e finn-a
Da campagna e da marinn-a
Vegnan tûtti a respiâ:
A pä proprio imbarsamâ.
E chi mai porrieiva dî
I grand’ommi nâti chi?
Che grand’ommi de antenati!
Che giuristi e letterati!
L’arpa d’öu, che o biondo Apollo
A-i poeti o pende a-o collo,
Quanti nostri l’han portâ!
E da tutti celebrâ!
Basta o nomme do Chiabrera,
Ch’o l’ha creôu un’atmosfera
Da poesia ciû delicâ
A-o gran Pindaro ispirâ.
De Crociati in Taera Santa
Se ne conta ciû d’ottanta:
Capitanii ûn çentanâ,
Vittoriosi in taera e in mâ.
Quanti figgi valorosi
Han versôu da generosi,
Pe difende a nostra taera,
Tutto o sangue, eroi de guaera!
Fin doi Pappi chi son nati,
De belle Arti mecenati.
E di insigni Cardinali
Han avûo chì i sêu natali;
Ne-e belle arti e fra i sapienti
Gh’è ne staeto di eminenti;
De Colombo o genio ascì
O l’è nato proprio chì,
Nè o vorriâ nisciûn scordâ
N’ätro nostro gran mainâ:
Paneado, ommo d’ardimento
Degno invëo de monumento.
Chi gh’è gente de bon cheû,
De travaggio e boîn figgieû;
E de quanti chì ne ven
No peûan dïne ätro che ben.
Semmo donque sempre frae
E o bon nomme da çittae
Saiä sempre benedio
Da-a sovrann-a man de Dio!