O Cicciollâ 1930/Barchezzata a-o ciaeo de lûnn-a
| ←Serenata d’âtri tempi | O Cicciollâ de Barchezzata a-o ciaeo de lûnn-a de Gioxeppe Cava |
E stelle do mae chêu→ |
| lasciòu inalterâ a grafia do "Cicciollâ". |
Barchezzata a-o ciaeo de lûnn-a
(Canson)
I
Sta seja a lûnna pinn-a
d’argento a innonda o mâ,
e-a brixa ponentinn-a
a veja a fâ gonfiâ..
Rosin, drissemmo a prua
in mezo a sto splendô
e confondemmo i baxi
da lûnn-a e de l’amô.
Perchè contro a-o mæ sen
ti chinn-i a testa brûnn-a?
O nostro amô segreto
a nö tradisce a lûnn-a.
Sente che dôçe invito
vegne da-o çô seren,
mentre ogni cösa a canta:
— Zoeni, vorreive ben! —
II
Ti veddi là Savonn-a
de lûxi pontezzâ:
a pä ûn feston de stelle
desteiso lungo o mâ.
Fra quelle lûxi ascösa
o dorme a têu casetta,
dove a-a finestra ho visto
ûn giorno a têu faccetta.
Lazzû pe a primma votta,
o cäa, ti m’hæ sorriso,
ti m’hæ svelôu da vitta
l’incanto e o paradiso;
e, comme questa seja,
l’ho streita in sce-o mæ sen,
e a bocca e o chêu t’han dito
— Rosin, te vêuggio ben! —
III
Rosin, comme a sparisce
lontan, lontan a riva;
in mezo a ’sta bonaçça
a barca a và a-a deriva....
A và, in ta carma cippa,
a và, ma a no governa,
vinta da tûtto o fascino
de ’sta bellessa eterna....
Lascemmo a scotta in bando,
no serve ciû l’aggiaxo,
vivemmo o nostro sêugno,
gödimmo questo baxo
de lûxe che in silensio
ciêuve da-o çê seren,
mentre i chêu nostri cantan:
— Te vêuggio tanto ben! —