O Cicciollâ 1930/A l'è coscì...!!

by Andria Gioxeppe Rocca

←L’allarme generale do 23 lûggio 1848 a Savon-na

O Cicciollâ de Andria Gioxeppe Rocca A l’è coscì...!!

O Tortelasso→

lasciòu inalterâ a grafia do "Cicciollâ".

A l’è coscì...!!
(Da Microscopio e Telescopio de Savon-na pe-o 1850)

Canzon

I

Credilo çertiscimo
Da bon cristian
Che o mondo termine
Cö sô dan-dan,
Che un tempo scimile
No s’è mai visto
Primm-a da nascita
De Gesù-Cristo,
E nisciûn’opera,
Che i vaegi han scrito,
A l’ha mai dito.
Pensa e ripensighe,
No sò che dì;
A l’è cosci...!!

II

Ho letto a storia
Prusciann-a, ingleise,
Chineise, austriaca,
Russa, françeise,
Tartara, eccetera;
Son mäveggiôu
Che un caxio analogo
Non ho trovôu!
Questo o l’è o secolo
Di belli esempi!
Che rari tempi!
Pensa e ripensighe, ecc.

III

No se sa proprio
Comme parlà,
Donde se naveghe,
Dove se va;
Misericordia!
Da un pezzo in sà,
Che no se blattera,
Che no se fa!
Se l’uman genere
O perde a testa,
Cosa ghe resta?
Pensa e ripensighe, ecc.

IV

Chi ä vêu ciû tenïa,
Chi chêutta, o crûa;
Chi guaera predica,
Paxe segûa,
Chi è avanti a-o popolo,
Chi va inderrê,
Chi crïa pe-o proscimo,
Ma o crïa per lê,
Chi vêu repubblica,
Chi è socialista,
Chi comûnista.
Pensa e ripensighe, ecc.

V

Anchêu ve nominali
Liberatô,
Doman retrogrado
E traditô,
Pregan un fulmine
Ch’o ve derisse,

Un-na bon'anima
Ch’a ve menisse.
Se ciâman principi
E questo e quello....
Oh che bordello!
Pensa e ripensighe, ecc

VI

Che siâ chi merita
Stimm-a ed onô
Ch’o se sacrifica
Pe-o patrio amô,
Sentì che lengua
Grendi e piccia:
O a fâ ä Gesuitica,
O l’è un codin;
Con mille cancheri
Ghe dan addosso
A ciû no posso.
Pensa e ripensighe, ecc.

VII

Ma chi pe-a patria
O cria co mêue,
O infia spropoxiti
Comme e nisêue
Pe f.... Tizio,
Checco, Bastian,
E o fa in ti circoli
Da ciarlatan,
L’è applauditiscimo;
E o siâ un stivâ!
Cose ve pâ!
Pensa e ripensighe, ecc.

VIII

Con sto vocabolo
De libertae
Ciù che in preterito
Semmo lighae.
Vêuan finn-a abbatine
A religion,
Ma Dio ve nominan
In ta canzon,
Dixan de creddighe,
No gh’è a fidäse,
Son faccie fäse.
Pensa e ripensighe, ecc.

IX

In ciassa e in bettûa
Vêuan parlâ tutti
D’idee politiche,
O belli, o brutti:
Mentre se disputa
Pë concessoîn,
S’inton-na o gloria
Con i cannoîn.
Sciòrte i re barbari,
Bombardatoî,
Traditoî.
Pensa e ripensighe, ecc.

X

Sovrani e sudditi
Son in questiôn,
O vêu dî o popolo
A so raxiôn,
O s’arsa libero
A-o sesto çè,

Poi tutto subito
O l’ha in t’un pè:
E sta commedia
Chi l’ha inventâ?
Nisciûn ou sâ.
Pensa e ripensighe, ecc.

XI

E do Santuario
Scinn-a i Ministri
Mettan discordie,
Fan da Anticristi
(So chi se merita
Sta staffilâ),
Dixan a-o popolo
Ch’o ä deve insâ:
Vendan a patria
(Che crudeltae!)
Per di dinae!
Pensa e ripensighe, ecc.

XII

I fêuggi pubblici,
Che antigamente
Ean comme oracoli
Per ogni gente,
Oua ve schiccheran
A-e lô manëe
Cose falsiscime
Che dixan vëe:
No vêuan ciù creddighe
A-o dì d’anchêu
Manco i figgêu.
Pensa e ripensighe, ecc.

XIII

I diplomatici
Vêuan radunase,
Che o caxio o merita
De consûltase.
Un viaggia in Austria,
L’atro pe-a Fransa....
Ritornan careghi
De mâ de pansa....
Che sacrifizio!
Grande indavvêi!
Oh che piaxêi!
Pensa e ripensighe, ecc.

XIV

Se va a-e battaggie,
Ma no se sa
Per che propoxito
O se ghe va:
Frattanto (ahi misêi!)
Cazzan i frae,
E crian Italia
Da despëae:
S’otten vittoria
(Miae con che fin!)
Con di quattrin!
Pensa e ripensighe, ecc.

XV

E quattro stupide
Vaegie donnonn-e,^[1]
Giastemmatiscime

E mascarsonn-e,
Che senza numero
Han zà scannôu
E praevi e môneghe
Per o passôu,
Vêuan fa da diaconi
A-o Pappa cäo:
Oh pöveo diäo!
Pensa e ripensigli, ecc.

XVI
^[2]

XVII

Sempre ghe medito
Seia e mattino-a....
Ma nò, ve replico,
Perdingolinn-a!
Che un tempo scimile
Non s’è mai visto
Doppo da nascita
De Gesù-Cristo.
Comme l’imbrêuggio
O terminiâ...??
O no se sa.
Pensa e ripensighe, ecc.

XVIII

Se stemmo ä lettera
De profezie,
A mae giudizio
No gh’è da rie:
Son vëi miracoli,
Che in mae z....

No posso veddighe
Ciù netto drento.
Frac, preparemose
Ch’andiemo a-o fondo:
L'è o Finimondo!!
Pensa e ripensighe,
No so che dì;
A l’è coscì...!!^[3]

1. Il lettore le conoscerà, e noi ci esimiamo dall’imbrattar queste carte del loro nome (Nota del testo).
2. La strofa manca nel testo.
3. Poesia politica, nella quale si rispecchia la grande confusione d’idee e di sentimenti che, per qualche tempo, sino all’avvento del Cavour, segui alla prima disgraziata guerra del Risorgimento Italiano.