O Cicciollâ 1930/L'allarme generale do 23 lûggio 1848 a Savon-na
| ←Segretto per disnâ da-o chêugo senza speisa | O Cicciollâ de L'allarme generale do 23 lûggio 1848 a Savon-na |
A l'è coscì...!!→ |
| lasciòu inalterâ a grafia do "Cicciollâ". |
L’allarme generale do 23 lûggio 1848 a Savon-na
(Da O Canoccialin, supplemento a-o Canocciale de Savon-na pe-o 1849)
Alleluia, scì alleluia!
A l’è andaeta tûtta a puia!
Doppo aveìghe ben sûôu
Finalmente o s’è asmortôu!
Ahimè, sento che respïo,
De pensâghe me ne rïo!
L’atra nêutte, a dïla sccetta,
Me creddeivo che Cicchetta
Pe disfâse zà de mi
A vorresse fâme moî:
Ma, Deo gratias, son sarvôu,
O gran fêugo o s’è asmortôu!
Dunque tûtto aoa ve diö,
E da cappo incomençiö.
So ben çerto de saveì
Ch'ëa de Lûggio o vintitrei!
E zà o giorno o se n’andava,
Poco ä nêutte ghe mancava: —
Lì da-a Gexa ä protezion
Dedicâ da Concezion,
Gh’è un locale de derrë
Dove sta i Carabinë
(E da quello che ne sento,
L’ëa de moneghe un convento).
« Oh miae là, miae là che fûmme!.
O me pâ vedde un gran lûmme!
A fornaxe a no l’è lì?
O Main cäa cose ti dî?
L’è de festa! — no veddeì?
O se brûxa pe indavvei! ».
E o convento o se brûxava
Ma nisciun se busticava. —
Mi ch’andavo adaxio adaxio,
In sentî ste paöle a caxio,
Me regïo, e veddo tûtto
Neigro neigro dappertûtto!
— O l’è a-o Borgo...! santo Dio!
O ghe brûxa.... e me gh’asbrio:
Quando son tosto vixin
Un me tïa zû pe-i fädin,
E pe fâme spaventâ
O me cria: a l’è a so cà!
Bon per mi ch’ho a faccia franca
Che o coraggio o no me manca,
E o no manca a mae moggê
Ch’a l’ha un cheû da granatté;
Ma se invece ëimo de quelli
Ch’an de tûtto un gran spavento,
Eimo ben dui belli oxelli!
Un solenne svenimento
O vegniva ä mae Scignôa;
Mi pe zunta poeivo allôa
Vegnî matto, oppû restâ
Dûo lì commne un baccalà!
Miae che imbroggio! miae un pö lì,
Marscarsoin, cose vêu dì
No vorrei prevedde i caxi
E operâ comme fa i axi.
— « Parla, parla, parla Berto
Che ti predichi a-o deserto! ».
Tiemmo avanti: — che spettacolo,
e o s asmorta o l’è un miracolo!
Ti veddeivi sciortî fêugo,
Sciortî fûmme da ogni lêugo
De scimugge scin-na a-o çê!...
Ma lascemmo pe caitae,
Che se sciûscia a tramontan-na,
A ne brûxa tûtta San-na!!!
Guai s’o fosse (e se ne dà
Pe-o piaxei de fä do mâ),
Guai s’o fosse un tradimento!
A l’è brûtta in mae z....!!!
Ma no ö creddo, e no ö creddiö,
Tanto meno ghe pensiö,
Perchè dixan che in Savon-na
A l’è tûtta gente bon-na,
Scia i foestë, che i Savoneixi,
E mi o so ch’o l’è di meixi:
O sä staeto un aççidente....
Ma poi mi no gh'ëo presente....
O sä un caxio imprevedûo,
Comme tanti o n’è vegnûo.
Mi me bêutto zû o cappotto,
Sguâro scin-na o camixotto,
Sciû a-o convento camminando
E crïando e tempestando,
Daeghe, amixi, sciû, coraggio!...
E lì picco e lì derrûo,
E menisso tûtto a-o scûo
Perchè o fûmme o n’inorbiva.
Dappertûtto o se sentiva
Chi batteiva, chi sbraggiava,
Chi pregava e giastemmava,
E o tambûo d’intanto intanto
Con o solito so canto
Rattaplan e rattaplan
Accresceiva o ramaddan,
E un-n’oëggia, povea diâ,
Meza sorda a m’è restâ.
A dâ agiûtto ghe mandavan
Tûtta a gente che trovavan
E pe e stradde e per a ciassa....
O sûnnava a Campanassa....
A doe öe l’è andaeto un ommo
A sûnnâ quella do Dommo....
Do gran sciato n’ho sentio!
Basta, basta, o l’è finio!
O che nêutte indemoniâ!
In memoia a n’è restâ!
A-o mattin o l’è parsciûo
Fosse zà tûtto segûo,
E me son cacciôu in letto
Pe guardâ de fâ un sûnnetto;
Quando sento.... rattaplôu!
Zû da-o letto son satôu;
Torna.... o fêugo o l’incomensa!
O Segnô, daene pazienza.!
E tornemmo tûtti quanti
A fâ quello faeto avanti: —
Fin-na ae ûnze o l’è dûôu,
Finalmente o s’è asmortôu.
Lodo dunque i Reverendi,
Cëghi, abbati, piccin, grendi;
Lodo i praevi da Miscion,
I Scolopii lodo ancon;
E Serviti e Agostiniani,
Cappuççin, Carmelitani,
Che se son mostrae zelanti,
E son corsi tûtti quanti;
E chi e i nomino imbroggae
Tale quale l’ho trovae:
Lodo i alunni di Collegi
Che in te l’arte paivan vegi;
Lodo i Anzien de sta çittae,
Tûtte quante e Autoritae;
Lodo a Guardia nazionale
Ch’a l’ha tolto ben do male;
Lode grande ä fanteria,
E ä scelta artiglieria,
Che sci ben ha travaggiôu
E ogni elogio sorpassôu;
Lodo i ricchi, i povei diäi,
Piccin, zoveni, scoläi,
Ch’an perdûo pe-o gran corrî
Libri, penne, e che so mi:
E coscì vegnindo zû
E donnette co-i Monsú;
Lode a tûtti i meistri d’ascia,
Ch’an portôu picosso e ascia,
Con i nostri boin cäfatti
Che corrivan comme matti;
Ma non posso assae lödâ
Quanto vêuggio o barilâ,
Ninte meno i cai ferrae
Che de chêu se son prestae;
Lodo o sodo caregâ,
E asci o furbo bon mersâ,
Ch’o corriva cö piatâ,
Cö camallo e o cappellâ
Cö sarto, sensâ, speziâ,
Cö scarpâ, fideâ, fornâ,
Cö tortâ, cö bûttegâ,
Cö pellâ, cö mascellâ,
O robusto bon serrôu,
E o flemmatico pescôu,
L’ostaiante, con i ortuen,
Fornaxae, con i villen:
Lodi lunghe e larghe ben
Ai mainae, ai massachen;
Lode infin ai brai mercanti
Che pareivan comandanti.
Ma un-na cosa mi vorrieiva,
Franco a chiunque ne parlieiva,
Zà che semino coscì avanti
Comme o veddan tanti e tanti,
Che mettessan di Pompê,
Che savessan o mestê.
E coscì là in ti Casciae,
Fra e casuppole amuggiae,
(E se devan regordâ
Ben di Forni sto Frevâ)
Quella stradda progettâ
Quand’o l’è ch’a se faiâ?...
Se n’è dito, dito, dito!!!
Se n’è scrito, scrito, scrito!!!
Se a Savon-na exempli grazia
Succedesse un-na disgrazia
Ben ciû grossa de sta chi,
A poriescimo impedî,
E salvâla in concluscion
Dä futûra perdizion.