Ms. Ricci 176/Risposta dro Rever.do
| ←torna a l'endexo | Poesie in lengua Zeneise de Risposta dro Rev. P. Lazaro Gianello |
Replica a ro Rev.do→ |
| Da-o ms. Ricci.176, Arch. Stor. do Comun de Zena, www.storiapatriagenova.it. azonto quarche acenti: acento grave = vocale curta, acento aguçço = vocale longa, -où = dittongo |
Fra doze segni in Cé sempre muoé nasce,
E a ro zirá dro só l'inzovenisce.
L'anno, scio Giurian, ch'oura finisce,
E acquista senza morte nuoeve fasce.
Ne a guisa d'Anteo s'erze cazendo,
Ne comme biscia fa ra pelle nuoeva,
Perchè senz'invegí lié se renuoeva
Ne nasce da ra cenere morendo.
Ma solo a ro zirá dro só zirando,
Va l'anno ancon, mentre d'intorno o zira
Dra Cilindra Celeste a ra gran spira,
D'ato a basso retrogrado passando.
Ne dro Bifronte Dio, che non è fin
Dra sò prudenza lascia morí l'anno,
Ma quello renovando senz'inganno
Dra natura renuoeva re attioin.
Ma non finí za vuoi d'immortalave
E a sosn dre vostre muse naturé
Se quand'ancon un aze cavarché
Dri alloggi de Pindo havei ra ciave.
In cangio dro saruo arcistupendo,
Ch'in rimma m'havei feto d'un Orlando,
Un bon capo dell'anno ve remando
Meque da cap'a pé tibi commendo;
Ma a dí comme l'intendo
Sció Giurian, a ro sentí dro son
Dra vostra Piva me lament'ancon.
Ro famoso Anfion
Ch'in ro sò canto hebbe si gran virtù
De tirá a lé re prie in sciù, e in zù;
Perchè vuoi de lé ciù
A parei mé meriteressi assé
Che ve ciovesse attorno re saxé,
Quando tra noi passé
Perchè se zà Anfion fu immortaloù
Per havei con ra cetra fabricoù
A Tebe ro muroù;
Vuoi con ri vostri scriti fabriché
Coverte a re sazisse, e servellé,
Ergo ciù a noi zové,
E consequenter merité ancon
Lode fra noi ciù degna ch'Anfion;
E in gratia dra saxon
Scusé ra purité dra mé intrapreisa,
Che parlo sano modo, e sanz'offeisa.