Ms. Ricci 176/A ra Signora Anna Adorna bonne feste
| ←torna a l'endexo | Poesie in lengua Zeneise de A ra Signora Anna Adorna bonne feste |
A ra Sig.ra Delia Spinnora Relation→ |
| Da-o ms. Ricci.176, Arch. Stor. do Comun de Zena, www.storiapatriagenova.it. azonto quarche acenti: acento grave = vocale curta, acento aguçço = vocale longa, -où = dittongo |
Lustrissima Patronna.
Eccave l'anno dro cinquant'e quattro
Che torzando ro collo,
Perchè no gh'è recatto
Da meghi abbandonoù,
Non ghe zovando ciù
Chi se l'ha finn'oura in cié portoù
Mentre sò fré piccin ghe resta herede,
E immediatamente a lé succede;
Per finí ri suoe giorni oura de tira
O ne ghe cianta, e moribondo o spira.
Ch'o vagghe in santa paxe,
Perchè apponto de lé, ni de sò fré
Non n'havemmo mesté,
S'in primmaveira, e sté
In l'autunno, e l'inverno
Con ro só, lunna, e stelle o dava lé
Vitta, perfettion, luxe, governo,
Scioi, frute, cose tante a noi portando
Per vitta, e gusto nostro esercitando
Con tanti muoei fra ló conformi, e varij
In discorde vision quattro contrarij.
A mi, in ogni caxo,
Non me ghe manca stelle, lunne, e soí,
E scioi, frute, elementi,
E chi no se ro crê ve mire in cera,
Ch'o proverà, ch'in vuoi trová possemmo
Tutto ro ben ch'in questo mondo havemmo;
Onde ne basta in queste sante feste,
Che s'un anno se parte, un atro reste.
Si che in questo paeise
Mentre d'un Anna o gh'ha l'anno, e non cura
Per dí in bonna mezura,
Cose l'anno ghe leva, Anna ghe torna
L'anno ro desguernisce; Anna l'Adorna.