Lunaio Regiña 1891/4
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
I piaxeì da töa
CANSONETTA
Me ciamiei razionalista,
Me daiei do leccardon,
Do goloso do puffista;
Ma mi son de l'opinion
Che de tûtti l'è a gran moæ
Quella tôa donde mangiæ.
2.
Li se mangia, li se beive,
Li se canta, li se rïe,
Li se fà, li se riçeive
Çento e mille cortexïe,
Li se baxan comme fræ
I nemixi ciû arraggiæ.
3.
Li s'inizian i maiezzi,
Se consacran co-o disnâ;
Li, scazzendo di battezzi,
Se fa scelta do compâ;
Li gh'è o regno da poexïa,
Da salûte e l'allegria.
4.
Doppo e bælle passeggiäte,
Doppo e gïte de piaxei,
Doppo i teatri, e campagnäte,
Ve sentî comme in dovei
D'assettäve a quella tôa
Che da-i stenti a ve rescïöa.
5.
Bællo fä quell' antipasto
Con salamme e pescisæ,
Bællo dä ciû d'ûn attasto
A duî funzi li addobbæ,
E sciorbîse ûn broddettin
Senza pan nè fidellin!
6.
Bællo tiäse sciù a cappella
Con duî gnigni de raviêu
In to tôcco de vitella,
E dappoi bagnäse o chêu
Con döe die de Monferrâ
Che v'aggiûttan a mangiâ!
7.
Quande portan li o pescetto
Che ve pä ch'o mescie ancon,
Ve ne tiæ zù ûn tascelletto
E con l'agro de limon
Con de l'êuio e ûn pö de sâ,
Ghe tiæ drentro a forçinnâ.
8.
Se gh'avesci a buridetta
De peagallo o nazellin,
O de bronco o de seppietta;
Se gh'avesci li o tiänin
Gremenio d'ancioëte pinn-e,
Ve collæ scinn-a e forçinn-e.
9.
Se se tratta de pollaia,
Pe-o mæ naso no me và
O pollastro a-a cavallaia;
Ma ûn pittin de fracassâ,
Un pö d'anca o d'ä rostïa,
Scûggian zû comme milïa.
10.
Ben che a levre a no desdixe,
A l'è roba ûn pittin bassa
In confronto da pernixe
E do tordo e da beccassa:
E dôe quägie o duî faxen
Ve ghe zêugan sempre ben.
11.
No saieìvan fêua de lêugo
Se ghe foise duî crocchin
Ben êuiæ, rostïi da-o fêugo
In ta poëla li adaxin:
Ma o ciû raro bocconetto
Convegniei ch'o l'è o bonetto.
12.
No gh'è ræsche, no gh'è ossetti,
Ma li gh'é de tûtto bon:
Funzi, triffoli, öxelletti,
E fighæti de cappon,
E çervella, e gelatinn-a;
Da ecclissane a çimma pinn-a.
13.
No son roba fêua de posto
Çinque o sei spellinsighæ,
D'insalatta con o rosto:
No desdixe che mangiæ,
Doppo questo, ûn pö de frûta
Pe bagnave a bocca sciûta.
14.
Ve ven poi delungo a taggio
Un tocchetto o duî granin
Specialmente de formaggio
Gorgonzola o Piaxentin
Pe sciûgave tûtto o grasso
Che ve sguazza zù dabbasso,
15.
Seggei pochi o seggei tanti,
In scië squagie do disnâ
Pochi dösci son bastanti
Pe poei fave destappâ
Döe bottigge de Barbera,
De Bracchetto, o de Madera.
16.
Sorsezzando lentamente
Unn-a cicca de caffè
Con quell'äia sorridente,
Ve pä d'ëse ciû che i re
Do Gran Cairo e là do Sciöa
Che son chen da vostra töa.
17.
Sant'arneize, che pe tûtti
Ti te rendi necessaio,
Chi te faççe i möri brûtti
Ti no gh[']æ che l'ûzûraio,
E l'avaro ch'o n'intende
Che servixi ti pêu rende.