Lunaio Regiña 1891/3
| ←I accertamenti da tascia in scï fabbricati | Lunaio zeneize compilao da-o sciô Regiña & C. pe l'anno 1891 de A celebre traversata do Mediterraneo in to ballon fæta da l'inzegnê Juan Brûn |
I piaxei da töa→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
ballon fæta da l'inzegnê Juan Brûn.
Pe-i giornali accreditæ
E pei canti da çittæ
S'annunziava a-i quattro venti
I famozi esperimenti
In sciä guidda do ballon
Pe qualunque direzion.
2.
O spagnollo Juan Brûn
In presenza de ciû d'ûn
O l'ha dîto e o la[sic] ridîto
De risolve o gran quesîto
Relativo a-o navegä
Sciû per l'äia, comme in mâ.
3.
I scienziæ da nostra Zena
Criavan zà: scialla Manena!
Viva, viva o gran portento
Chi saiâ patron do vento,
Chi porriä, comme o vêu lê,
Fä di viägi sciû pe-o çê!
4.
E l'illustre associazion
De Lettûa e Conversazion
Pe mostrase benemeita
In ta trappola a l'è cheita
Con tant'ätri çittadin
Comme o nostro Guastavin.
5.
Questo cappo redattô
In to Caffaro, e scritô
Circondôu de fama e stimma
Tanto in prosa comme in rimma,
O l'andava in to ballon
Pe coraggio e pe pascion.
6.
L'ëa de fæsta, e ben che in villa
Foîse un terzo da çittæ,
Pe-o Bezagno e là pe-a Pilla,
E pe-i punti ciù elevæ
Gh'ëa gran sciäto e concorrenza
Pe stä a vedde a gran partenza.
7.
Là da-o Prôu e là da-a Cäva
E da-a gëxa de San Pê
Sen[s]'ansciä se contempläva
O ballon che, ne-o Ciantê
Gremenio tûtto de gente,
O s'insciava lentamente.
8.
Tiäva ûn pö de tramontann-a,
E mormoäva zà ciù d'ûn
Che straccoä manco a Moäsann-a
No porrieìva Juan Brûn
Se ciû queti e ciû clementi
No sciûsciävan çerti venti.
9.
Gh'ëa ciû d'ûn ch'alzando o naso
Con a punta di stivæ
Fermamente o l'ëa persûaso
Che o ballon celebritæ
De da-a Foxe in mëzo a-i cöi,
O straccoasse là fra i möi.
10.
Fæto sta che co-a presenza
D'ûnn-a sûcca da tortä
O ballon misso in partenza
A quattr'öe doppodisnâ
Pe troncä tûtti i confronti
O s'alzava sorvia i monti.
11.
Mi confesso ingenuamente
Che là verso o settentrion
Gh'ëa do bællo e sorprendente
Nell'ammiä quello ballon
Tramandä comme ûn splendô
Riflettûo da-e nûvie e o sô.
12.
Guastavin da quell'altessa
Contemplando a sò çittæ
O l'aviä visto a bellessa
E l'incanto e a varietæ
Do sò mâ, da sò rivëa,
Da no fasene ûn'idëa.
13.
Quella Zena in miniatûa
A l'aviâ strasecolôu
E chi sa con che premûa
O l'aviâ tûtto annottôu
In to brioso sò taccuin
Pe informane i çittadin!
14.
Finalmente, comme a lûnn-a
Che mandando çerte strisce
Da sò lûxe gianca e brûnn-a
Poi tra e nûvie a scomparisce,
Tra e gren nûvie chi o crovîva
O ballon o scomparîva.
15.
Ritornando tûtte e gente
Verso i centri da çittæ
Giûdicavan variamente,
Ciû o meno imprescionæ,
A partenza e o risûltôu
Do ballon famigerôu.
16.
Ma o ballon dopp'ëse stæto
A viagiä tra i Appennin,
Za de gaz mancante affæto,
Con brûxö de Guastavin
E de gente da sò sfera,
O cazzeiva in te Voghera.
17.
Guastavin a-o sò ritorno
Drento e mûagie da çittæ
O l'ha misso a o ciæo do giorno
Con ciû prêuve a sò onestæ
Circa o scopo e l'intenzion
Da sò andata in to ballon.
18.
S'è conclûso che e correnti
Attrovæ da-o sciö don Juan
Pe viagiä con tûtti i venti,
Fîto o tardi se ne van
A finï tra l'ironia
Comme sempre l'ûtopïa.