Lunaio Regiña 1891/5
| ←I piaxei da töa | Lunaio zeneize compilao da-o sciô Regiña & C. pe l'anno 1891 de Parole d'ûn allievo de l'Officinn-a Redenzion Fondâ in Zena da-o Professô Nicolla Garaventa |
Donna bælla fortûnâ!→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
Parole d'ûn allievo de l'Officinn-a Redenzion
Da ûn ciúvözo caroggetto
Comme ûn sascio zù arriguôu,
Mi, con ciû d'un battuzzetto
E ciû d'ûn pregiûdicôu
Fava o bindolo pe-e stradde
E pe-i ponti e pe-e caladde.
2.
Tiando d'arpa ne-e granaggie
E ne-e balle de coton,
Guadagnava quattro scaggie
Pe accattame o menëstron;
E a me paiva ûnn-a fortûnn-a
D'addormïme a-o ciæo da lûnn-a.
3.
Stava drento in t'ûnn-a ciatta
Tûtto intento a-o mæ lavô
Quande læsta comme a gatta
Unn-a guardia do Questô
A spiegava a sò bravûa
Con portäme ûn pö in Questûa.
4.
Là, tra i sbirri e tra e manette,
Quello bravo e bon figgiêu
De Questô, con parollette
Che toccavan o mæ chêu,
O firmava a garanzia
Do mæ allogio in sant'Andria.
5.
In te quella vea sentinn-a
Do delitto e d'ogni mâ
M'iniziava ne-a rapinn-a,
Ne-a grand'arte d'arröbâ,
Ne-o saveì, quande se sciorte
De de lá, cacciä zû e porte.
6.
In che moddo son sciortïo
No ve o vêuggio manco dî,
Comme vive l'ammonio
Da voiatri o poeì capî;
Ma confesso che mentr'ëa
In sce l'orlo da galëa;
7.
O sciô bravo Garaventa
O m'ha dîto: « Ferma lì!
Faccia brutta, anima tenta,
Ti ghe vêu vegnî con mi?
Se ti vegni lazzû in fondo
Te mettiö a l'önô do mondo. »
8.
E piggiandome a braççetto,
E locciando o so baston
O me tiava zû a passetto
Verso la[sic] nave Redenzion;
Verso a nave che in coscienza
Pêuan ciamala Provvidenza.
9.
Signorscì! Là, sensa ûn citto,
Sensa pesti e da pestâ,
Se fa schêua con gran profitto,
Se provvedde da mangiâ,
E se rende a-a societæ
Di boin figgi e di boin poæ.
10.
Là s'impara, là s'imprende
Guadagnäse da mangiâ,
Là s'inizia, chi gh'attende:
In te l'arte do mainâ;
La s'impiega in t'ûn bon fin
A caitæ di çittadin.
11.
Mi no façço pe vantalo
Nè accatame o sò favô;
Ma quest'ommo pêuan ciamalo
Garaventa o Redentô;
E prestaghe quell'aggiûtto
Ch'o se merita in te tûtto.