Lunaio Regiña 1890/Prefazion
| Lunaio zeneize compilao da-o sciô Regiña & C. pe l'anno 1890 Prefazion |
Un amîgo a-a prêuva→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
Gente cäe l'è chì o Novanta
Circondou da-a päxe armâ
Che finzendo d'ëse santa
A no fà che rovinâ
E finanze de nazioîn
Con di mûggi de cannoîn.
2.
Oh! perchè con tanti lûmmi
No veddemmo de chi lì?
Perchè i barbari costûmmi
Tra noiätri avian coscì
Acciantôu reixe profonde?
O Novanta o ve risponde:
3.
Fin che regna l'ambizion,
A giöxia, l'adûlazion,
A gran sæ de cöse nêuve,
Lüxe o sô ma dï che ciêuve:
Dï che a forza de progresso
Ritornemmo ne-o regresso.
4.
Ben che son cûrto de vista,
O Novanta o l'ha raxon:
E s'o cianze, e s'o s'attrista
No ghe dï pöveo mincion
Perchè questa päxe armâ
Chi sa mai comme a finiâ!....
5.
Mì n'accûzo e monarchïe
Mì n'accûzo e religioin;
Ma chi semina e giöxïe,
I sospetti fra e nazioin?
Chi corrompe a societæ?
A sä forse a civiltæ!......
6.
Oh! lasciæme ûn pö sbraggiâ:
Tûtti in casa gh'emmo o mâ;
Tra i vulchen l'è o mondo vëgio
Pe caxon do Privilëgio
Ch'o l'ha puïa che i scciavi gianchi
De soffrïlo seggian stanchi.
7.
Nè Bismarcke o l'è convinto
De l'inzëgno che ghe fan
Perchè questo laberinto,
Questo bosco do baccan
Ch'o promêuve d'arrescozo
Pe l'Europa o l'è dannozo.
8.
Servassæ ch'o mande in viägio
O sò nêuvo Imperatô
Che ghe davan o nomiägio
De Guglielmo o viägiatô,
Perchè a Grecia co-a Tûrchia
Han tra lö da gran raoxïa.
9.
E finzendose alleæ
Son dôe biscie inveninæ
Zà li pronte pe addentase,
Pe sciorbïse, pe sbranase,
Pe mandâ tûtto a sequæo
Donde veddan poco ciæo.
10.
E quell'Austria chi dettava
Lezze a-o mondo con e armæ
Minacciä da-a razza Slava,
Mëza morta da-e bacchæ,
Mä crovindo a bïle antîga
Con l'Italia a fà l'amîga.
11.
Se l'Italia pe-o momento
A g'ha tanto da guagnâ,
Se l'è vëo che Trieste e Trento
A porriâ riconquistâ,
Ch'a no faççe a spaximante
Pe-a politica austriacante,
12.
Bella Italia, mi vorriæ
Che progresso e civiltæ
Foisan solo a tò bandëa,
Che ti foisci allegra in ciëa,
Sempre forte, ardimentosa,
Grande, bælla e prosperosa!
13.
L'è ben vëo che gh'emmo a Franza
Che consunta da-o venin
A deslengua ne-a speranza
D'assätate in scï confin;
Ma ti forte e indipendente
Ti no devi däghe a mente.
14.
Perchè lê, repubblicann-a,
A l'è scciava incadenâ;
Perchè lê a no n'è lontann-a
Da-o sentîse rinfacciâ:
« Ti, nazion libera e franca,
« Ti perlecchi l'orsa gianca. »
15.
E lasciù ne-o Settentrion
Gh'è ciù neigro che o carbon;
E l'Autocrate da Ruscia,
Con o vento che ghe sciûscia,
O doviæ fäla finïa
Abolindo a Teocrazia.
16.
Saìva ben ch'o se spëgiasse
In Don Pedro Imperatô
Che scibben ch'o governasse
O Brazì con tanto amô,
In t'ûn ætte o s'è addesciôu
Abolio, detronizôu.
17.
Saiva ben ch'Êuropa tûtta
A cessasse i armamenti;
Saìva ben che seria e mûtta,
Pe levâ di mäcontenti,
A çercasse a päxe vëa
Sotto a mæxima bandëa.
18.
Bella Italia, fortûnâ
Mi te vêuggio ûn pö ciamâ
Pe-o Stellon che dappertûtto
O t'è largo do so aggiûtto;
Pe-a concordia, pe-o bon chêu,
Pe l'ûnion di tò figgiêu.
19.
Bælla Italia, seggi giöza
Da tò santa Indipendenza,
Vanni libera e orgoglioza
Do tò nomme de potenza,
Ma no fä ciû l'Arlichinn-a,
Te ne prega o scio Reginn-a!
20.
Saìva ben che ti cûrasci
E tò cöse commerciali;
Saìva ben che t'aumentasci
I vagoin ne-i nostri scali;
Che t'avesci ciù premûa
D'aggiûttâ l'agricoltûa.
21.
Bælla Italia; saìva ben
Che, lasciando a-i Africhen
O penscëo de governase
E de voei civilizzâse,
T'æsci a santa pretenscion
D'ammermâ l'emigrazion!