Lunaio Regiña 1886/Prefazion
| ←endexo | Lunaio zeneize compilao da-o sciô Regiña & C. pe l'anno 1886 Prefaçion |
Revista da Çittæ→ |
| Zena, Tip.-Lit. di Fræ Paghen, stradda Luccoi , n. 52 - exemprâ conservao inta Libraja Naçionâ Centrâ de Romma |
Prefazion
L'anno vëgio, cai lettoî
O l'è tosto lì per moî
Ma cattìvo de natûa,
Bench'o cazze e ch'o derrûa,
Con quell'aia de minaccia
Da-o venin storçendo a faccia
O l'è pin de presûmî
De despëti a ciù no dî.
Ben che mi ghe fava e frasche
E de baxi ben ciocchæ
Ghe sûssava scinn-a e masche,
Questo faccia da maschæ,
Con l'inganno e cö regïo
Comme Giûdda o m'ha tradïo!
Mentre sorvia e sotto o sô
Se viveiva in paxe e amô,
Lê sciortindo dä so sgûscia
O viägiava là pe-a Rùscia
Semenandoghe a pascion
Da conquista e do cannon
Con l'idea d'aççende a guæra
Tra o Cosacco e l'Inghiltæra.
Zà tra lö se minacciavan
D'occupâ l'Afganistan,
Zà da-i porti no lasciavan
Ciù sciortî manco de gran,
Zà per l'aia gh'ea do brûtto;
Ma dappoi cessava tûtto.
Se pe-a grazia do Segnô
S'arrangiavan tra de lö,
L'anno vile, indegno e crûo
In Italia o l'è vegnûo
Con o scopo d'addesciâ
L'ambizion da nostra amrâ[sic]
Chi spediva a mëgio trûppa
(A mangiâ brennosa e sûppa?)
Lazzù a fä de vitte gramme
In te sabbie e ciù affoghæ,
A rostî peì e pellamme
A creppä de cado e sæ,
Pe aspetâ comme l'ombrigo
Se passasse l'inemigo.
Che terribile lezîon
De profonda ûmiliazion
Emmo avùa da l'Inghiltæra
Che ne o vivo da sò guæra
Con l'Egitto e i Africhen
Dicciarando voine ben
Doppo fäne tante frasche,
A-o cessâ de so burrasche.
Bravamente a ne lasciava
Lazzù soli a fä i buffoin
Mentre a Romma se passava
E famose Convenzioin
Concedenti a ferrovia
A-i sensæ de l'angonìa?...
Doppo tûtto l'è spuntôu
O cholera detestôu
Che piccando in te Palermo
Con violenza e de pê fermo,
Da çittæ bonn-a porzion
O cacciava in to cädion
Con gran dö d'Italia tûtta
Chi se l'ha zà vista brûtta.
Poi sätava o mâ nervoso
A-o ministro sciö Coppin
Pe poeì rendilo ciù odioso
A-i stûdenti de Tûrin
E de tûtta Italia intrega
Che contraia a se ghe spiega.
Quello fä da inquixitô
O ghe fa ben poco onô.
Sotto l ombra da bandea
No s'ûrtemmo con l'idea,
Sotto e lezzi da nazion
Rispettemmo l'opinion,
Che prevedde e conseguenze
No se pêu de prepotenze.
Pêu ben ëse radicale
O Paolotto e guadagnâ
Unn-a fama universale
Ogni amante do studiâ,
Pe çercâ l'onesto e o veo
Ghe vêu libero pensceo.
Pe l'invidia, pe o brûxô
De quest'anno traditô
Se sciûppava sà a castagna
Da Germania contro a Spagna.
Ean zà pronte e due nazioin
A decidde co-i cannoin
A question de Carolinn-e
Chi tegniva o chêu in te spinn-e.
Ma Bismarche vorpe antiga
Rimettendo a Pappa Lion
L'onorevole fadiga
De risolvighe a question,
Senza sparze sangue o poeìva
Ottegnî ciù ch'o no voeìva.
Ma metteiva l'anno bon
Torna a Spagna in apprenscion
Con cacciaghe dappertûtto
O cholera, o singao brûtto;
Con mandaghe là co-i ciù
In ta sciô da zoventù
O re Alfonso chi l'amava
E co-e tasce o no-a strosciava.
Zà Repûbblica e Carlisti
Se veddeivan minacciâ
Tempi orrendi, tempi tristi
A a sciâ Spagna desgraziâ;
Ma cessava ogni rovinn-a
Co-a reggenza da reginn-a.
E quest'anno ciù ostinôu
Nêuvamente o l'ha tentôu
De poeì mette in ballo a Fransa
Con ûn pö de mä de pansa
Provocôu da i elezioin
E da-i soliti imbroggioin
Che portava torna in lista
O partïo legittimista,
Gh'ea di scintomi e de prêuve
Che ne-a Fransa desgraziâ
A-o famoso Ottantenéuve
Se doveìva ritornâ
Quando a sgréûxo de quest'anno
Scompariva ogni malanno.
Ma o nemigo d'ogni ben
O l'aççende in scï Balchen
Un exempio de barbaria
Infra a Serbia e frä Bulgaria;
E s'ammazza fræ con fræ
Comme chen di ciù arraggiæ
Mentre tûtte e gren potenze
Stan a fä de conferenze.
Primma i Bulgari son vinti,
Doppo restan vinçitoî;
Ma no son miga convinti
Che gh'è treì imperatoî
Che zûgandoli a-o balletto
Ghe fan fä da marionetto!...
Finze l'Austria de tegnî
Con a Serbia pe no dî
Che ghe premme Salonicco
Paize bello, allegro e ricco;
Finze a Rûscia d'aggiûttâ
A Bulgaria fortûnâ,
E ghe premme i Dardanelli
Che per lê son troppo belli;
Ma se, forse, a sciâ Tûrchia
Ciù in Europa a no portiâ
Nè tûrbante, nè sciscia,
Mai ciù dito no saiâ
Che noî popoli latin
Stemmo a battise o pansin!
L'anno marso de venin
O l'è là pe tiä o gambin,
E l'è chì l'Ottantesei
Meno grave de penscei,
E a despëto de sò fræ
Tûtto chêu tûtto caitæ,
Pin de bûrle, pin d'axillo,
Che d'ammialo me recillo!
O me dixe: cao Reginn-a
Bella reìxe do mæ chêu,
Se t'agguanto pe-a marscinn-a,
Se te mando di figgiêu
Che te tïan di beccheletti
Daghea zù pe-i caruggetti.
Se de guære no ghe sä
Tûtti in paxe se viviä;
Se gödiemo l'abbondanza
Senza vive de speranza,
De continuo battichêu
Pe-a famiggia, pe-i figgiêu,
Pe-o decoro nazionale,
Pe-o sviluppo commerciale
D'inventâ de nêuve tasce
No pensiâ ciù l'esattô
In sce quello c'ha da nasce;
E co-a grazia do Segnô
Se mostrian ûmanitai
Pixonanti e ûzûrai.
Ciû progresso e civiltæ
E guadagni sbardellæ
Ghe saiä ne-a nostra Zena
Chi sbraggiä: scialla Manëna
Lasciù a Romma g'han pensôu
De no fäme perde o sciôu
Co-i continui mæ lamenti
Che s'ammerma i bastimenti!...
Co-a mæ smania originale,
Con o chêu tra rêuze e scioî,
Daggo a tûtti ûn bon Natale
Specialmente a-i mæ lettoî
Che m'ûsavan compascion;
E finiscio a prefazion.