Esopo Zeneize 1822/A Rondanin-na, e i Oxelletti
| ←A Sigaa trovâ co-i Grilli | Esopo Zeneize de A Rondanin-na, e i Oxelletti |
O Figgiêu, e a Vespa→ |
| Zena, Stampaja Pagan, 1822 - Primma ediçion e en stæti reixi con êu e ôu. In notta e diferençe co' l'ediçion do 1846. |
A Rondanin-na, e i Oxelletti.
Un-na votta a Rondanin-na,
Quando o lin se semmenava,
A l’andò da-i Oxelletti,
Per so ben ai conseggiava
De pittâ tutta a semenza,
Ma nisciun ghe dè credenza;
Doppo dexe, o duze giorni,
Nascè o lin, da lô a tornò,
De mangiâlo, o de guastâlo
Nêuvamente ai conseggiò;
Ma nisciun ghe desse mente,
E a ciammon impertinente;
A l’andò torna da lô
Quando o lin o maturava:
Figgi cai, guastælo presto,
Descciantælo, a ghe sbraggiava,
Ve l’ho dito zà træ votte....
Ma ciù un pö ghe dan de botte;
A scappò da quelli alloa,
E dall’ommo a se n’andò,
Ao pregò da so amicizia,
E con questo a pattezzò
De fâ o nïo per primma baze
Sotto i teiti de so caze;
Quando o lin fù raccugeito,
Se fè o spago, e a terragnin-na;
In to nïo stava segûa
Co-i so figgi a Rondanin-na,
Ma co-i roccoli, e i sorchetti
Fun piggiæ quelli Oxelletti.
Questa Foetta a l'è adattâ
Per quelli ommi testardoîn,
Che no san mai profittâ
Di conseggi e di paêi boîn,
Fan e cose a sò capriçio,
Senza sæximo[1], e giûdizio,
Così[2] van presto in mallôa,
E s’accorsan solo allôa
D’êse stæti axi, e testardi,
Se ne pentan, ma l'è tardi.