Esopo Zeneize de Martin Piaggio
O Figgiêu, e a Vespa
Zena, Stampaja Pagan, 1822 - Primma ediçion
e en stæti reixi con êu e ôu.
In notta e diferençe co' l'ediçion do 1846.


[p. 47 modifica]
FOA XXVII.

O Figiêu, e a Vespa.


Un bardascia de Figiêu,
Che stâ drito appenna o pêu,
O l'ea un giorno in t’un giardin,
Pin de scene e d’axiLlin,
Camminando, galoppando,
Giando sempre, sätezando,

[p. 48 modifica]

O l’arranca aôa un-na sciôetta,
Aoa o streppa de l’erbetta,
Aoa o zêuga ai saxi[1] o ä balla,
Aoa o scöre un-na farfalla,
Oh che tresto de Figiêu!
In ta pelle stâ o no pêu,
O desfà mezo o giardin
Con fâ sempre o burattin;

Stanco, e frûsto o s’assettò,
Tutt’assemme ghe passò
Ben d’appresso, e sgêuando[2] bassa
Un-na pesta de Vespassa
C’un pâ d’äe, che paivan[3] d’öu,
A se và a posâ sciùn[4] cöu,
Sciun’erbetta[5], sciun-na[6] sciô,
A lûxiva comme un Sô;
Da lì a un pö da lé a ritorna,
O Figiêu, chi a vedde torna
Così[7] bella, e tutta indoâ,
O-a vorieiva un pö piggiâ,
O l'aspêta ch’a repasse....
A l’è chì.... o l’allarga e brasse...
Ghe tia presto un-na magnâ,
Ma... per sorte a gh’è scappâ
Camminando comme o scento;
Lé tant’æ non è contento,
Ghe ne ven sempre ciû vêuggia;
Quella a và d’in rammo in fêuggia

[p. 49 modifica]

Giando sempre pe-o giardin,
Lê fà un miggio de camin
Sempre apprêuvo a scorratâla,
Ma o no posse mai piggiâla;

Finalmente a se stancò,
Scun-na rêusa a se posò.
O se scialla o Gardettin,
O và presto là ciannin
In sciâ punta ben di pê,
Quando o fù vixin a lê,
Quaccio quaccio comme o gatto,
Quand’o piggia qualche ratto,
O ghe tiò presto unn'arpâ:
Grin ti gh’è, o se misse a criâ,
O piggiò co-a væspa a sciô,
Ma meschin de lê! Che dô
O sentì, poveo Figiêu!
O gh’arriva fin-na a-o coêu:
A vespassa invenninâ,
A ghe tiò un-na zagoggiâ
Cö sò morscio velenoso
Ch’a tegniva drento ascoso,
Ch’o cazè, buttando un crîo,
Longo in tæra stramortîo.

Oh voi-atri Zovenotti,
Che corrì comme i merlotti
Sempre apprêuvo a di piaxeì,
Che ancon ben no conosceì,

[p. 50 modifica]

Imparæ da quest’istoja,
E tegnîve un pö a memoja
Che ben spesso e cose indöæ
Son de drento avelenæ.

  1. sasci
  2. sghêuando
  3. paeivan
  4. sc’un
  5. Sorve unn’erba
  6. in t’unn-a
  7. Coscì