Cava in to remoin 1930/E DELIZIE DÖ VEXINATO
| ←Büsche e travi | In to remoin de E delizie dö vexinato |
Edûcazion in famiggia→ |
E DELIZIE DÖ VEXINATO
«Vexinn-a ch'ôa l'é?... Ö mae relêuio
o se fermôu a ûn botto questa nêutte...
Unzôe e meza? Va ben! Ghe n'hei de l'êuio?
G'ho e fave da condî… son meze chêutte...
Grazie, Manin!... Scûzae zà che ghe semmo
gh'aviesci ûn spigo d'aggio e 'na preizinn-a[1]
de sâ pesta... due fêugge de porsemmo?[2]
Me rincresce chinâ... no g'ho a picinn-a...
Da stamattin l'é andaeta da sêu nonna
mae sêuxôa Rosinin, a êuggi gianchi...[3]
O fischia zâ?... Segnô, mî povia donna,
fra poco saian chí!... Gh'ei çinque franchi?
Me manca ö vin e ö pan!... Seî ben che matti!...»
«Fany, se posso offrî, g'ho anche i piatti?...».