Ro Chittarrin/In lode dro sig. capitan Lorenço de Fer

by Steva de Franchi

←À ro virtuosissimo signor cavaliere Antonio Rafaele Mengs

Ro Chittarrin, o sæ strofoggi dra muza de Steva de Franchi In lode dro sig. capitan Lorenço de Fer

À ra signora Catariña Gabrielli primma donna→

In lode dro Sig. Capitan Lorenço De Fer, bravissimo dilettante de Muxica, e insigne Sœunnao de Flauto traversiero.

SONETTO.

Quello, che voî sœunæ, flauto traverso,
Sciô Capitañio, sì polito e netto;
Che de fâro sentî sença defetto
Gh'hei sapuo destanâ si ben ro verso:

Chi l'ha inventao, n'anderæ matto e perso,
S'o poresse sentîve, e ghe scommetto,
Ch'o se ne piggeræ tanto diletto,
Fin à cantâ re vostre laode in verso.

O lauderæ ra vostra imboccatura,
Da ra quæ ven quella soavitæ,
Quella dolçeçça, e quella appoggiatura;

E pe fâve giustiçia, pœu o diræ,
L'è dovuo, che de questa gran bravura
Memoria reste à ra futura ætæ.