Poexie zeneixi do Feliçe Santi/O cä mæ Zena
| ←San Pê da Föxe | Poexie zeneixi de O cä mæ Zena |
Sovia unn-a tomba→ |
| Zena, Derelitti, 1940 transcriçion diplomattica (no l'é dito che-a grafia a no segge quella do curatô de st'ediçion postuma, ciutosto che quella de l'aotô) |
O Zena, Zena! O tæra bella e santa!
Chi, döppo aveite visto e conosciûo,
Dimme: Chi o lè, chi o lè, chi no te canta;
O cä mæ Zena dôve son nasciûo?
Quante te vêuggio ben, ti ti no’ sæ;
Quante te ne vorriö e te n’ho vosciûo,
O tæra che ti crêuvi tûtti i mæ,
Che ti croviæ mi asci, ne son segûo!
T’ê pinn-a de palassii e palassiinn-e,
De belle stradde e ciasse e caroggin,
Ti te parti da-o mâ, pe monti e chinn-e,
Tûtta gremîa de verde e de giardin.
Tûtta goernîa, a l’ûzo de reginn-e
De smeraldi, de fiôri e de rûbin.
T’ê ricca de castelli in scië collinn-e
E semenâ de gëxe e campanin.
T’ê Venere, covèrta de diamanti,
Che i sö belli pessin a bagna in mâ;
Ti fæ l’êuggin, ti rîi a-i naveganti,
T’ê a tæra de Colombo e da fainâ!
Se fîse poeta e a Mûza a m’aggiûttesse,
Mi te vorriæ cantâ da çimma a fondo;
Vorriæ descrîve tûtte e tö bellesse,
Fale vedde e conosce a tûtto o mondo!
Ma, pe’ parlâ de ti, no son mi quello!
N’atra voxe ghe vêu, n’atro respîo,
N’atro saveì che o mæ, n’atro çervello...
Un-angiôu ghe vorriæ, mandôu da Dio!
Oh quante vötte ti me vëgni ä mente,
Comme vampâ de fêugo in tante zimme!
Oh quante vötte o mæ chêu o te sente
Cantâme o verso che no pösso esprimme!
Oh caroggetti maccajôzi e scûi;
Fasciêue, patâeli e braghe repessæ;
Contrasti co-i broccati e co-i vellûi,
Emblemi de mizeia e d’önestæ!
Oh buttega da Gianca a petenæa
E pügnatton da Tëxo a vendi piæ,
Oh baccalæ da Rêuzo a frisciolea
E testi da Bedin, pin de fainæ!
Palassii, case, che formæ ûnn-a stöja,
Dä Lanterna vegnindo scinn-a ä Pilla;
Ombre di Giûstinien, di Fieschi e-i Döja;
De Mazzini, Mameli e de Balilla!...
Oh quante vötte me vegnî in ta mente,
Comme vampâ de fêugo in tante zimme!
Oh quante vötte o mæ chêu o ve sente
Cantâme i vèrsci che no pösso esprimme!