Piaggio M. - Poesie 1846/Varietæ/L'Ommo ben majoù
| ←O Sciäto de Zena | Poexie de L'Ommo ben majoù |
A Villezzatûa→ |
| (ediçion Pagan - 1846) |
Compâ, e amigo Bertomê,
Ho sentïo con gran piaxeì,
Che doman piggiæ moggê,
Me rallegro in mæ davvei,
Coscì fa chi a pensa ben,
Coscì ha fæto vostro Poæ,
Nè voî sæsci fra i cristien,
Se a sciâ Ciccha vostra Moæ
A n’avesse a-o sciö Gaetan
Con piaxeì dæta a so man;
Bella cosa è o matrimonio,
Gran sorgente de piaxeì,
Qualche majo in testimonio
Ve çittiö quando vorrieì,
Ch’o l’è proprio ûn don do Çê
L’intoppâ bonn-a moggê;
Ma scicomme, amigo cäo,
No gh’è döse senza amäo,
Nè gh’è rêuza senza spinn-a,
Coscì in mëzo a-o matrimonio
Chi no sa ben navegâ,
Cazze a-o fondo, e va in rovinn-a,
Mille maj in testimonio
Ve porrieivo asci çittâ,
Che chi intoppa ûnn-a moggê
Capriççiosa, meschin lê.
Ma zà voî, no parlo a caxo,
Seì lontan da questo caxo,
Che piggiæ ûnn-a bella figgia,
Savia, e d’ûn bon naturale,
Nè con fâ trexento miggia
Ne troviesci ûn’atra eguale:
Onde impreteribilmente
Saeì feliçe eternamente;
Mi son stæto fortûnôu,
Che ûnna bonn-a n’ho intoppôu,
Me ne tegno assæ de bon,
Anzi, cäo, se o permetteì,
Vêuggio fâve a descrizion
De delizie, do piaxeì,
E do stato fortûnôu
D’ûn chi seggie ben majôu,
A serviâ pe incoraggîve,
Stæme attento, vaddo a dîve;
A-o finî da nona lûnn-a,
Doppo aveì piggiôu moggê,
D’ûn masccietto ho avûo a fortûnn-a
Sommeggiante a mi, e a lê,
Cosa, che vêuggio augurâ
A voî ascì, bello compâ;
Doppo quæxi ûn tempo eguale
Diventeì torna pappà
D’ûnn-a figgia tale e quale
O ritræto de mammà,
O terz’anno a mæ famiggia
A crescè d’ûn’atra figgia;
O quart’anno, mascolin;
O qnint’anno, femminin;
Neûtro o sesto, a l’abortì;
L’atro apprêuvo a ghe sûpplì
Binellando, ma per dîla
Brevemente, e per finîla
Tûtti i anni, senza fallo,
Mæ moggê a me fa ûn regallo
Per no fâ mancâ a famiggia
O d’ûn masccio, o d’ûnn-a figgia,
E per fâme ben majôu
A l’ha finn-a abbinnellôu.
Son trez’anni, Bertomê,
(E pê ûn giorno) che ho moggê,
Me pâ d’ëse ûn generâ,
Che famiggia! a pâ ûn’armâ;
De quattorze son zà poæ,
Tûtti vivi, e in sanitæ,
Meno ûn solo chi è mancôu,
Perchè o mëgo o l’ha allûgôu,
E de ciù, da brava moæ,
A se i ha tûtti allevæ.
Compâ cäo, consola o coêu
Veise lì tanti figgiêu:
Chi da ûn baxio a so mammà,
Chi fa e frasche a so pappà,
Gôde[sic] a bella scinfonïa
D’ûn che cianze, l’atro crïa,
Chi pe-o pan, chi pe-o tettin,
Chi è arraggiôu, chi ha l’axillin,
O ciù grande o n’êu stûdiâ,
L’atro apprêuvo o vêa demoâ,
Unn-a a fa ûn’impertinenza,
L’atra a fa scappâ a pazienza,
Azzunzeighe Bertomê,
Qualcösetta pe-a moggê...
Ecco o stato fortûnôu
D’ûn chi seggie ben majôu;
Ah! o l’è ûn gran divertimento
O doveì tûtte e mattin
Fa o so bello testamento,
Spende ûn sacco de quattrin,
E pe cose? pe accattâ
Colazion, çenn-a, e disnâ.
E a non è ûnn-a cosa bella
O doveì d’ogni pittin
Mette man, e vêuâ a scarsella
Per vestî grendi e piccin?
Aoa a meistra co-a röbetta,
O cûxôu co-a marscinetta,
Aoa o conto do caegâ,
Aoa quello do mersâ;
A modista pe-o pissetto,
Cappellin, scialli, frexetto,
D’ogni pö manca ûnn-a braga,
Mammà dixe, e Pappà paga.
Ecco o stato fortûnôu
D’ûn chi segge ben majôu.
Che delizia l’è o pensâ
A doveì ben edûcâ
Mascci, e figgie, che d’ammiâli,
Van crescendo a vista d’êuggio,
Poi bezêugna collocâli,
E majâ.... ma chi no vêuggio
Andâ fêua do semenôu,
Torno a voî, che seì spozôu,
Mi che son canna provâ
Vêuggio dâve se ve piaxe,
Çinque avvisi da compâ
Per poeì vive in santa paxe,
Eccoi chi, ma in confidenza:
Primmo armâse de pazienza,
Negâ sempre a sò voentæ,
Spande, e spende gren dinæ,
Aveì torto e mai raxon,
Ese asperto, e pæi mincion,
Usæ questi, che vivieì
Sempre in paxe, e se no poeì,
Compâ cäo, restæ fantin,
Dunque fæve cappuççin.