Piaggio M. - Poesie 1846/Varietæ/L'Insopportabile
| ←L'Inverno do 1830 | Poexie de L'Insopportabile |
No ghe n'è ciù ûn dio de netto→ |
| (ediçion Pagan - 1846) |
Fra i caratteri molteplici
Componenti a Societæ,
Gh’è i preziosi, gh’è i ridicoli,
Gh’è i modesti, gh’è i sfrontæ,
Gh’è i amabili, i stimabili
E tant’atri a vario merito
Che taxiö per brevitæ:
Ma, fra questi se ne trêuva
Un (per sorte raro assæ)
Fæto apposta, a tûtta prêuva,
Per frusciâ l’ûmanitæ,
Che in pretendise adorabile
O se rende Insopportabile!
Quest’aborto de natûa,
O l’è fîto conosciûo
All’andata, e ä so tornûa ,
Perchè o marcia altiero e dûo,
E và sempre de premûa,
Nè mai rende a chi o salûa,
Striscia solo i Titolæ,
E non stimma che i Dinæ!...
Quand’o l’è c’ûnn-a Scignöa
A brassetto — meschinetto!
O se pâ ûn Adon allöa,
Un Narciso, ûn Idoletto
Che ogni Bella o l’innamôa,
Ma o l’è incangio ûn Marionetto!...
Quand’o l’è in conversazion
O pretende dâghe o ton
Con voeì fâ da Saputello;
Se ûn discorso intavolæ,
V’interrompe in to ciù bello,
E o no vêu ciù che parlæ;
In te tûtto o contraddixe,
Spûa sentenze, sprexa i dotti,
Latinezza, e gösci o dixe
Da piggiâlo a scuppellotti;
Individuo seccantiscimo,
Chi se credde importantiscimo,
Ficcanaso dappertûtto
Chi raxonn-a da ûnn-a bestia,
Chi se loda per modestia
E contrasta sempre tûtto;
Dieì d’aveì a töa mangiôu
(Per exempio) ûn bon boccon,
Un piattello delicôu...
Ohiboibò!... ûnn-a porcherïa!...
Solo lê g’ha o chêugo bon....
(E o va sempre ä Trattorïa).
Se o trovæ ne-o bûtteghin,
Se v’accosta a-o tavolin,
S’impossessa da gazzetta
E de quanti fêuggi ei lì,
Giascia, leze - sciurbe e detta,
E ve spûa in ta faccia ascì!
Che se presto no scappæ,
Stæ segûi che regittæ!....
Se andæ a-o Teatro, e l’eì vixin,
Gran disgrazia! andæ via sûbito,
Dunque no godî o spettacolo,
Che o ve rompe o chittarin
Co-e so ciarle, applausi, e sii,
Che ve fan vegnî stordii....
Quand’o va in qualche palchetto
Per Madamma (o pe-o sciurbetto!)
O fà ûn sciäto maledetto,
Un sûssûro de galëa,
Che te o fischian d’in platëa,
Ma o no temme tacche in cëa;
Lê discöre de politica,
De commercio, economia,
Comme o primmo diplomalico...
Ma zazzûn de cose storiche,
E meschin de geografia
Dixe balle dell’ottanta!....
E ricchezze so o milanta,
Da so abilitæ o se vanta;
Di so onori, e dignitæ,
O se pâ ûn’ommo de stato,
E, scordando chi ëa so Poæ,
O l’azzunze a-o so casato
Un pittin de nobiltæ!!....
Pù, quest’essere antipatico,
Questo sciollo euciclopedico,
Quest’egoista, sto stivâ
Chi è tra l’ommo, e l’animâ,
Chi non ha virtù nisciûnn-a,
Chi no sa parlâ, e taxeì....
O l’è o figgio da Fortûnn-a
Che trionfâ a-o Mondo veddeì.