Piaggio M. - Poesie 1846/Schiribisso
| ←Indovinello façile | Poexie de Schiribisso |
Viaggi e Campagnate→ |
| (ediçion Pagan - 1846) |
Che bella cosa - è l’Onestæ!
(Dixeiva ûn Oste - ä so meitæ);
Oh quanto credito - per lê acquistemmo!
Quanto concorso - de gente gh’emmo!
A-i nostri impegni - sempre adempimmo,
A pansa e a stacca - per lê s’impimmo!
Paghemmo sûbito - i venditoî,
Femmo credenza - a-i compratoî;
E n’imprestemmo - a chi non ha
Co-i frûti e o pegno - comme ognûn sa....
Che cosa bella - è l’Onestæ!...
Damme da beive - Cicca che ho sæ;
Dimme! a propoxito - ti hæ battezzôu
Quello vin forte?.... - L'ho raduggiôu!
Nell’ægua-vitta - quello pastisso
Per fâ o Rosolio?.... - Scì, ghe l’ho misso!
O vin de Malaga - per Præ Donnôu
Ti l’hæ ancon fæto? - O l'è inlaccôu!
Ti n’hæ provvisto - carne de Gnäo
Per fâ o stûffôu?.... - Scì, coso cäo!
Ti hæ brustolïo - a Cicorêa
Per fâ o Caffè?.... - Quanta ghe n’êa!
Tûtto qnell’Amido - ne-o Sûccao fin
Ti l’hæ mescciôu?.... Scì; pestûmmin!
Quello formaggio - verde camuôu
Chi sa de pæsta?.... - O l'è grattôu!
E o Gran cattivo - per fâ o pan bon?....
L’ha zà o Moinâ! - Brava! Ciccon!
De fâ l’Ostessa - ti ë proprio degna:
Vêuggio fâ scrive - sotto l’insegna:
Questa a l’è a Bettoa - de l’Onestæ!
A questo moddo - se fa dinæ!