Piaggio M. - Poesie 1846/Prefazioîn e Reviste da Çittæ/1834
| ←Revista, Anno 1833 | Prefazioîn e Reviste da Çittæ de Prefazion, Anno 1834 |
Prefazion, Anno 1835→ |
| (ediçion Pagan - 1846) |
*
E dov’ælo o Trentetreì
Co-a grillesca so canson
Bella e brûtta do Treì-treì? ...
O l’è andæto in consûmmon!
Meschinetto!... o l’è giassôu,
O l’è zero diventôu,
E ingûggeito in ti passæ,
Per accrescine l’etæ,
E perchè no se scordemmo
Che all’Occaso s’avansemmo!!...
Comme passa i anni fito!
Son vint’anni, e me pâ anchêu,
Che l’ho dito e l’ho redito,
E nisciûn credde se o vêu,
Perchè tanti han tûtti i anni
(Domandæghelo) i stess’anni,
E fan sempre da figgiêu.
Ma o l'è stæto (per dî o veo)
Un annetto ben da rëo,
Da no lamenlàse guæi,
Meno quelli çerti cæi,
Che lùxivan per fâ scûo
Dove poeiva nasce un scûo.
Sorve Zena o l’ha versôu
O so Corno d’Abbondanza;
Se a ciù d’ûn ninte è toccôu,
A n’è stæta so mancanza,
Bezêugnava ëse ciù asbriôu,
Cacciâ l’Ancoa da Speranza,
Perchè a tanti a g’ha agguantòu;
Bezêugnava......bezêugnava......
(Me dixeiva ûn chi negava)
Ese figgi.... da fortûnn-a!...
Ma aoa tanto a l’è tûtt’ûnn-a,
L’anno vegio o l’è finïo,
A-o passôu se dixe addio;
Ve parlïo dell’Anno nêuvo,
Che da quanto scrito trêuvo
In t’ûn libbro de pappê,
E da quanto scrêuvo in Çê
Pe ûnn-a çerta Congiunzion
De Pianeti e Stelle fisse
In ta Casa do Scorpion,
E pe ûn improvviso Ecclisse
O dev’ëse ûn anno bon
Da ligâ i chen co-e säsisse;
Abbondanza d’êujo e vin,
Carestia de Pan piccin,
Annâ doggia de salammi,
Quägie a uffo, e merli a sciammi;
Se guägniä di gren dinæ,
Se scciûppiä de sanitæ;
No sentiemo discorrî
Ciù de Cholera o de Grippa,
Ma d’impîse ben a trippa,
E d’andâse a divertî.
Tûtte e liti co-e raoxïe
Bonn-e fighe!... saan finïe;
Tûtte e Guære in tæra e in mâ,
Bonn-e fighe!... han da seccâ;
Paxe, paxe Generale,
Allegressa ûniversale,
Quete, ûnion, prosperitæ,
E con tûtto o resto apprêuvo
Che n’appaegia l’Anno nêuvo;
Che taxiö per brevitæ.
Se ti è dunque coscì bello,
Trentequattro, fatte avanti,
Me te levo de cappello,
E me metto finn-a i guanti;
Va de passo ûn pö ciù tardo,
No me fâ restâ boxardo;
Schissa o nazo un pö a-i birbanti,
Fa alzâ a testa a-o galantommo,
E da-o Mû distingue l’ommo;
Spetta a Ti de terminâ
I travaggi començæ,
E d’azzunze e d’ammermâ
Quanto pêu abbellî a Çittæ;
Spetta a Ti de mette l’ûzo
De levâ qualunque abûzo,
E de fâ sparî d’in scena
Dä sûperba nostra Zena
Tante cose misse in lista
In te quella mæ Revista...
Perchè ghe stan troppo mâ.
No me fâ sentî sûnnâ
Sempre e mæxime campann-e,
Ma fa comme de Grondann-e;
Che per bacco! finalmente,
Doppo tanto che ghe crïo,
E che e scöro, m’han sentïo,
E a soddisfazion da gente
Han battûo a generale,
Disertando van da-e Gronde
Per andâse (adaxo!...) a asconde
Con applauso ûniversale
In te tappe dove pêuan
Finnattanto che no mêuan
Affoghæ nell’ægua sâ..
Che no mancan pù d’andâ
Tûtte a reo, che mi ghe e mando,
Però .... senza contrabbando,
Distinzioîn, nè dilazioîn,
Manco aumento de Pixoîn,
Dunque o diggo a mæ Comâ....
Per no fâme ciù sfiatâ!....
Me meitieivo in pagamento
E per mæ ringraziamento
Unn-a Statua viva d’Ægua,
Chi passeggio pe-a Çittæ,
Quando ciêuve senza pægua,
Condannando a morte i Toæ,
E i Coniggi a stâ tappæ;
Che a l’exilia in sce duî pê
Tûtti i gren struppiæ foestê,
Che ven chi per fâ paradda
De so ciaghe in mezo a stradda;
Che a bandisce çerti zêughi
Che se ten pubblicamente
Da çert’öe, in te çerti lêughi,
E de ciù da çerta gente?...
Perchè son cattivi spegi;
Che a castiga i Garsonetti,
Che dan breiga a-i povei Vegi
Co-i proverbj e i becchelletti;
Che a comanda (e a fa osservâ)
Che se deggie e mûande mette
Chi de Stæ se va a bagnâ,
Tanto ciù sotto e mûäggette;
Che a prescrive (e a fa eseguî)
A-i Mûattê de no corrî
Per despêto addosso ä gente,
Ma andâ adaxo.... e d’avvertî....
Con proibîghe espressamente
De fâ tante traversadde,
E passâ per çerte stradde;
Che a domanda a CHI governa
(E a l’otten) l’Astregatûa
Finn-a a-e porte da Lanterna
Per levâ a gran bratta e pûa,
Perchè e gæe che ghe destendan,
E che a prexo d’öu ghe vendan,
No fan atro che impî o Porto
(Che o vegniä ben presto ûn orto)
Fan seccâ l’alberatûa,
Froscian tûtti i abitanti...
Poi che pescima figûa
Fa e Carrosse, i Carrossanti,
I Pedoin. e i Cavalcanti?
Sempre pin de bratta o pûa!!!
Prescindendo dä salûte,
Paan Mûattê, Cäri, Condûte,
Che van là dosso, e bordosso
Co-a so mermellata addosso!...
Che a fâ sûbito levâ
Tûtta quella gran rûmenta
A Piramidi ammûggiâ,
Chi conchêuxe e chi fermenta
Giorno e nêutte in quella Ciassa
Di Deneigri nominâ,
Dove s’impe ogni scarbassa,
E s’angoscia chi ghe passa!...
Se no a san dove ficcâ,
Se porrieiva (mi mê pâ)
Fabbricâghe ûnn-a baracca,
Per asconde quella cloacca.
Perchè in pûbblico a sta mâ.
Questa Statua per mi a trêuvo
Solo in Ti, bell’Anno nêuvo,
Falla dunque realizzâ,
Per mi falla passeggiâ
Tûtto Zena, e ciù ûn caroggio,
Che sûnniän campann-e a doggio
E ghe faan de gren cioccate.
Se t’avanza di dinæ
(Cosa che dûbito assæ)
Te preghieivo a no scordâte
A Facciata da Nunziâ,
Che coscì a sta troppo mâ,
Tûtta sgrezza e pertûxelli,
A pâ proprio ûn nïo d’oxelli;
Circondâ da tanti belli
Fabbricati decantæ;
A fa disonô ä Çittæ.
Se s’è speizo ûn pozzo d’öu
Per fâ ûn Teatro, e se ghe spende
Tûtti i anni (e cose o rende!!!)
Pe ûnn-a votta se pêu spende
Pe ornamento e per decöu
D’ûnn-a Gëxa comme quella,
Ripûtâ forse a ciù bella,
E a ciù ricca da Çittæ
Pe-i so quaddri rinommæ,
Pe-i gren marmi, pe-a pittûa,
Per l'interna architettûa,
Ma coscì brûtta de fêua!...
Se s’è speizo all’Accassêua
Tanto, e sempre se ghe spende!...
Pe ûnn-a votta (votta) se pêu spende
Pe-a Facciata da Nunziâ,
Che coscì a sta troppo mâ,
A l’inluveghisce a Ciassa,
E a fa rie o foestê chi passa;
Tanto ciù che (a dîla cæa)
Se gnägnieiva in ta monæa
Con levâ tanta Scainâ,
Chi no fa che imbarassâ,
E quell’atri Campanin,
Che son proprio Sûnaggin,
E che vegnan zù a tocchetti!...
Sciortiæ a mezo di Architetti
Con disegni e con progetti,
Per fâ travaggiâ l’Artista,
Trentequattro, aggila in vista.
Se ti vêu poi fâ do rombo,
Fa ûnn-a bella Statua fâ
Comme va, a-o nostro Colombo,
Falla fito mette, e alzâ
In t’ûn lêugo non asooso,
Ma o ciù pûbblico e vistoso,
Per servîghe d’ornamento,
Chè i Foestê son mäveggiæ
De no vedde pe-a Çittæ
Un sontuoso Monûmento
A-o grand’Ommo dedicôu
Chi ha scoverto ûn nêuvo Mondo,
All’Eroe chi è decantôu,
E invidiôu da tûtto o Mondo,
Ma che (a nostra confûxion)
Solo in Patria o l’è scordôu!...
Trentequattro, in conclûxion
Tocca a ti de fâte onô
Ciù che o to Predecessô;
Do gran coêu bezêugna aveì,
Che rozâ n’impe i fossoeì!
T’arregordo o patrio amô,
Imprinçipia con coraggio,
Che i dinæ nasciän per viaggio...
Stamme allegro, addio, salûte,
Che mi vaddo a pescâ trûte.