Piaggio M. - Poesie 1846/Esopo Zeneize/O Figgiêu e l'Amandoa
| ←O Cavallo e o Porco | Esopo Zeneize de O Figgiêu e l'Amandoa |
O Giäsemin e a Lelloa→ |
Un bello Figgio, ma disûbbidiente,
Andò ûn giorno a disnâ da ûn so parente,
E mentre ëan tûtti a töa,
Sciccomme o l’ëa cujoso,
O gh’inventò ûnn-a föa
Per giâ ûn pö tûtta a casa d’arescoso,
E andando, e camminando,
E ammiando, e frûgattando,
Unn’amandoa in despensa o I’attrovò,
Che sûbito o piggiò,
E voendola sciaccâ
De sprescia per mangiâ,
A questo buggibreiga e impertinente
Se ghe fè in menissetti o megio dente.
No seggiæ, Figgiêu, cujosi,
Nè magneschi, nè golosi,
Dunque o têuscego trovieì
Dove meno ghe pensieì.
