Piaggio M. - Poesie 1846/Esopo Zeneize/O Cavallo e o Porco
| ←O Luvo e a Vorpe | Esopo Zeneize de O Cavallo e o Porco |
O Figgiêu e l'Amandoa→ |
FOA LVIII.
Dä guæra ritornando,
Frûsto da-o gran travaggio,
Disse o Cavallo a ûn Porco
Chi grûgniva in to staggio:
Per cose ti stæ sempre lì a rûmmâ,
E mai ti no a finisci de giasciâ?
Per fâ o pötron, e gôve,
O Porco ghe rispose:
Son chi che mangio e ingrascio,
E ti, mincion, per cose
Ti væ ä guæra pe ûn pö d’onô a stentâ?...
Stattene in stalla comme mi a ingrasciâ!
Ghe replicò o Cavallo:
Taxi lì, porco brûtto!
Che mi o travaggio e a gloria
I preferiscio a tûtto,
Perchè è megio immagrî in mezo a l’onô,
Che ingrasciâ nell’infamia, e in to brûttô.
