Piaggio M. - Poesie 1846/Esopo Zeneize/L'Usûrajo e o Poeta
| ←A Calûnnia e l'Innocenza | Esopo Zeneize de L'Usûrajo e o Poeta |
O Lion e a Levre→ |
FOA XCIV.
Un de quelli brûtti mostri
Dall’Inferno regittæ,
Che ho zà visto a’ giorni nostri
Tûtt’assemme fâ dinæ,
Vegni ricchi de mïoîn
Per saveì fâ l’assascin,
Ma che ne-i vocabolaj
Son ciammæ per Uzûraj,
O no poeiva sto birbon
Soffrî ûn Poeta assæ bûrlon,
Che savendo e so pedate,
Conoscendo e baronate ,
I negozj, i mali acquisti,
I tappolli mai ciù visti,
Rovinando a gente a sciammi,
Ghe façeiva a tempo e a lêugo
Di belliscimi epigrammi,
Oo temeiva comme o fêugo;
Ma l'ëa tûtto tempo perso!
Ch’o l’ëa sempre ciù perverso
Continuando impûnemente
A mangiâse viva a gente,
Perchè a vorpe a perde o peì,
Ma i so vizj mai davveì.
Andò ûn giorno quest’Eroe
Ch’aoa illûstro in te mæ Föe
A veggiâ in conversazion
Da ûnn-a ricca Scignoronn-a,
Ch’a l’inviò questo griffon
Per conoscilo in personn-a,
Chè de fama o l’ëa segûo
Ciù che o peivee conosciûo.
Là o trovò ûnn-a societæ
De personn-e ben creansæ;
De bellezze, di talenti,
E di ricchi poscidenti,
Finn-a o Poeta capitò
Che in t’ûn canto se ficcò,
Perchè e Mûze co-a Fortûnn-a
No pêuan fâ liga nisciûnn-a.
Se fè ûn circolo brillante,
Chi zûgava, chi ciarlava,
Chi façeiva ûn pö o galante,
Chi di aneddoti contava
Quello in sciä Feliçitæ,
E quell’atro in scï dinæ.
St’argomento o l’allettò
Ciù de tûtti o nêuvo ricco,
Che lê ascì voendo fâ spicco
O so stato o decantò:
« Mi (dixeiva o sûperbion)
« Ho in boîn stabili ûn mïon;
« Fra öi e argenti ipotechæ
« A bon frûto ghe n’ho ûn atro,
« E atrettanti in boîn dinæ,
« Ho villezzi e palco a-o Teatro,
« Ho salûte e chêughi boîn
« Che me fan di boîn boccoîn;
« Mangio ben, beivo per treì,
« Sempre pronto a fâ piaxeì
« Contro pegno a chi ne vêu;
« Mi son viduo c’ûn figgiêu
« Chi promette o mæ talento,
« Ah!... son l’ommo o ciù contento!
« Con mi a sorte a no se stanca!....
« Dîme ûn pö cose me manca?...
Solo e forche, ghe sbraggiò
Lesto o Poeta, e o tabaccò.