Piaggio M. - Poesie 1846/Esopo Zeneize/O Lion e a Levre
| ←L'Usûrajo e o Poeta | Esopo Zeneize de O Lion e a Levre |
O Pescôu e l'Agno Mangiamosche→ |
Un Lion da so amicizia o l’onorava
Unn-a bella Levrotta so vexinn-a,
Che quantunqne spoiosa e ancon picinn-a,
D’aveì forza e coraggio a se vantava.
Un giorno a disse a-o Lion: « dimme ûn pittin,
L’è veo, che se voî atri Lioîn sentî
Un miseo Gallo fâ chichirichì
Ve spaventæ, e tremmæ comme i pollin?
Scì, l’è veo (ghe rispose), debolessa
De noî atre gren bestie!... l’Elefante
De sentî rûgnî ûn Porco o ven tremante,
E ûn Rattin ghe fa perde a so fortessa!
A l'è coscì davveì (quella a rispose)
Perchè mi ascì se sento ûn can bajâ,
Tremmo comme ûnn-a fêuggia, me ven mâ....
Gran difetto de bestie coraggiose!
