Piaggio M. - Poesie 1846/Esopo Zeneize/A Calûnnia e l'Innocenza
| ←O Cavallo e l'Aze | Esopo Zeneize de A Calûnnia e l'Innocenza |
L'Usûrajo e o Poeta→ |
FOA XCIII.
Unn-a votta a Calûnnia a se sciallava
D’aveì levôn l’onô all’Innocenza,
Anzi a se ne vantava
Da per tûtto con grande impertinenza.
Sta cosa in ti oeggie da Veitæ a l’andò,
Che sûbito a piggiò
Parte comme a doveiva a tanta offeiza,
E per ben fâ a difeiza
Dell accûsâ chi soffriva taxendo,
Giorno e nêutte cianzendo,
Ghe bastò d’arvî a bocca per parlâ,
Che a Calûnnia a scappò mucca e avvilïa,
Da-o rimorso scorrïa,
Da-o Tempo e dä Giûstizia castigâ.
