Piaggio M. - Poesie 1846/Esopo Zeneize/I duî Ricchi
| ←O Giäsemin e a Lelloa | Esopo Zeneize de I duî Ricchi |
A Gærava e a Tomata→ |
FOA LXI.
I DUI RICCHI.
No so ciù in te che çittæ,
Ma in to mæximo quartê,
Gh’ëa dai ommi ricchi assæ;
Un pensava solo a lê,
Mangiâ ben, beive, e dormî,
Ogni pö cangiâ vestî,
Andâ a-i teatri, a-e veggie, a-i zêughi
E cinciâse in mille lêughi,
De coêu dûo , senza mai dâ
Per limoxina ûn dinâ,
Di parenti gran nemigo,
Senza aveì nisciûn amigo,
Pin d’adûlatoî infiniti
Commensali parasciti,
L’appetitto e a digestion
Ean so tûtta occûpazion.
L’atro incangio ommo virtuoso,
De coêu grande e generoso,
Per lê poco se spendeiva,
O viveiva sobriamente,
Sempre averta a borsa aveiva
Per soccöre a povea gente,
E i so scialli e o so pensâ
Ean de poeì beneficâ.
L’ûn e l’atro finìn presto
I dinæ con tûtto o resto;
L’ûn pe aveì tûtto mangiôu,
L’atro tûtto regallôu,
Un pe-a göa e per vanitæ,
Pe amô l’atro, e per caitæ,
Se trovòn senza ûnn-a dæto,
Ma con questa differenza,
Che pe-o primmo no gh’ è stæto
Nè risorsa, nè ascistenza;
Scordôu, solo, abbandonôu,
Fin da quelli Adûlatoî
Che o l'aveiva desfammôu,
Ghe toccò dä famme moî!
All’incontro a-o so Vexin
Ghe toccò megio destin ,
Compatïo generalmente,
O fù sûbito ascistïo
Fin da quella povea gente
Che o l’aveiva soccorrïo,
Mai de ninte ghe mancava;
Ma Lê quanto gh’avanzava
Dava a-i povei comme primma,
Sempre ciù acquistando stimma.
O serrò i êuggi decrepito,
A so morte a fè do strepito,
Dexideôu da tûtti e cento,
Comme in trionfo o fù portôu,
Con gran pompa e sotterrôu
In t’ûn bello Monûmento
C’ûnn-a Lapide dixente:
Chi gh’è ûn morto ancon vivente
Pe aveì dæto i so dinæ
All’afflitta Umanitæ;
Lezi e imprendi, Passagê,
Prega poi paxe per Lê.