Piaggio M. - Poesie 1846/Esopo Zeneize/A Gærava e a Tomata
| ←I duî Ricchi | Esopo Zeneize de A Gærava e a Tomata |
O Mocchetto e o Lampion→ |
FOA LXII.
Unn-a Gærava grossa,
Matûra , fresca e rossa,
Trovandose vixinn-a
A ûnn-a Tomata buzza ancon piccinn-a,
A ghe disse sdegnâ:
Vattene, figgia caa,
Che appresso a mi ti ghe stæ troppo mâ,
Verde comme i limoîn!
Con mi che son ciù rossa che i armoîn!....
Inscipida, agra, amaa!
Con mi che son ciù düçe che I’amê,
E posso diventâ
Sûccao quando me pâ!....
Ti incangio dell’arfê!...
Vatt’asconde, che ti me fæ ghignon.
Ghe rispose a Tomata: ti hæ raxon,
Ma no me stâ a avvilî,
Söffrime anc’ûn pittin, aggi pazienza
Che speo ne-a Provvidenza
Ben presto de vegnî
Bella rossa, e gûstosa ciù che ti,
Che i chêughi no porriän stâ senza mi,
Che in tutto me mettiän
E per l’inverno poi me conserviän;
Ti incangio qualche giorno,
Se presto ti no væ a finî in t’ûn forno,
Forse scordâ in t’ûn canto de cuxinn-a,
O da ûnn-a bezagninn-a,
Atro che sûccao!.... ti pêu diventâ
Rûmenta manco bonn-a da ingrasciâ!
Chi troppo vêu prezûmme
E non vêu aveì nisciûn sorve de lê,
O l'è ûn ballon de fûmme
Chi parla per invidia do mestê.
