Piaggio M. - Poesie 1846/Esopo Zeneize/O Cavallo e l'Aze
| ←I Ratti e o Figgiêu | Esopo Zeneize de O Cavallo e l'Aze |
A Calûnnia e l'Innocenza→ |
Bezêugna, amixi, a-o mondo
L’ûn l’atro dâse aggiûtto,
Aveì caitæ fraterna
Con tûtti e da pertûtto;
Chè chi gode, e sta a vedde
I atri tribolâ,
Quand’o ghe pensa meno,
Gh’arriva addosso o mâ.
Un Azenetto gh’ëa,
Ma troppo caregôu,
Chi andava in compagnia
D’ûn Cavallo insellôu;
Poveo buricco! o sûava
Ansciando comme ûn bêu,
Se ghe doggiava e sampe,
E ghe mancava o coêu;
O disse allôa a-o Cavallo:
« Amigo, per caitæ
« Lévime tanto peizo,
« Pìggitene a meitæ!
« Per ti o l’è ûnn-a demöa,
« Per mi o l’è troppo stento,
« No posso ciù, cameadda,
« Sollëvime ûn momento;
« Te ciamman generoso,
« Séggilo anchêu con mi,
« Che dunque mêuo pe-a stradda;
« Mai me scordiö de ti.
Rispose con fieressa
Quello Cavallo ardïo,
Scrollando a testa e a cöa,
E doppo avei nitrïo:
Mi no ghe penso manco,
Nè son coscì mincion
De camallâ pe-i atri
Quando vacante son;
O fesse ûnn-a giavotta,
O gallezzò, o trottò,
E l’Aze, povea bestia!
Da lì a ûn pittin creppò.
De vedde o so compagno
Pe-o troppo peizo morto,
Solo o s’accorze allöa
D’aveì avûo gran torto.
Ma cose l’è sûccesso?
Un villan capitò,
O scaregò quell’Aze,
E sûbito ö spellò;
O l’assûffò o Cavallo
E ghe fè camallâ
A pelle, o bastò, o càrego
E lê con dâghe e sûâ.
