O Cicciollâ 1930/Son solo
| ←A di ninnoli de stoffa | O Cicciollâ de Son solo de Gioxeppe Cava |
Giornâ de sô→ |
| lasciòu inalterâ a grafia do "Cicciollâ". |
Son solo
A-a memoia de mae figgia
Son solo e stendo l’arco da mae mente
A rievocâ, e têu grazie biricchinn-e;
Son solo solo, eppûre t’è presente
E strenzo fra e mae man e têu magninn-e.
Vegno piccin piccin, e conto e votte
Che e man te fasso batte parma a parma,
E zûgando coscì me scordo e lotte
Da vitta desgraziâ e trêuvo a carma.
Ti gûsto ti ghe piggi, e in cantilena
Ti conti insemme a mi tûtta contenta,
E-a têu voxetta acûta a rasserena
Sto coêu ferìo da-o dô che o me tormenta.
Passa o tempo?... Nö so, no n’ho ciû o senso
Nell’illûxion, che lenta a me trasporta,
In to passôu feliçe, e ciû no penso
Che mi son solo e ti, mae ben, t’è morta!