 |
Questa pagina a no l'è stæta corretta. | |
Ti no è morta, mae Thea, perchè te veddo
Comme viva e te sento a mi vixin,
E, se destendo a man, quaexi me creddo
De accarezzâ feliçe o têu testin.
De votte a-a seia, quando m’assopiggio,
Ti vegni tûtta gianca verso mì,
E a voxe têu me dixe in t’ûn bisbiggio:
— No cianze ciû, papà, son chi con tì! —
Cose piccinn-e, semplici, graziose,
D’ûn ninte faete, eppûre tanto belle,
O fascino portae de forme snelle
De sêu magninn-e gianche e indûstriose.
Un tocchettin de stoffa, dôi frexetti,
Pochi retaggi ûnii con do bön gûsto,
Un cörpo de tesöie a-o punto giûsto
E a grazia tûtta scioïa di sèu pöntetti.
Quant’arte rivelae, che intelligenza,
Quanta armonia de linie e de cölöri,
Quantönque seggi semplici lavöri
Creae pe’ distrassion da-a sêu pazienza.
Sèi belle e no me stanco d’ammiave;
A vostra grazia tanto a m’incadenn-a,
E, se ve tocco, a man ve sfiora appenn-a
Pe’ a pöia, o cose belle, de guastave.
Son solo e stendo l’arco da mae mente
A rievocâ, e têu grazie biricchinn-e;
Son solo solo, eppûre t’è presente
E stronzo fra e mae man e têu magninn-e.
