 |
Questa pagina a no l'è stæta corretta. | |
Vegno piccin piccin, e conto e vette
Che e man te tasso batte parma a parma,
E zûgando coscì me scordo e lotte
Da votta desgraziâ e trêuvo a carma.
Ti gûsto ti ghe piggi, e in cantilena
Ti conti insemme a mi tûtta contenta,
E-a têu voxetta acûta a rasserena
Sto coêu ferìo da-o dô che o me tormenta.
Passa o tempo?... Nö so, no n’ho ciû o senso
Nell’illûxion, che lenta a me trasporta,
In to passôu felice, e ciû no penso
Che mi son solo e ti, mae ben, t’è morta!
Un sô sûperbo in çê, ûnn’aia finn-a,
Unn’allegrla in to coêu, a mente sveggia,
N’arxillo aççidentôu che o me trascinn-a
A gode fêua de casa sta mareggia.
E ti, casetta cäa, no te tradiscio
Se cedo a-a suggestion de sto splendô;
T’è bella comme ûn nio, ma pretenselo
Godime all’aia averta questo sô.
Sto sô coscì sgreion e coscì ricco,
Che o scenta via i tesori co-a sabacca,
Che e perle o versa in mâ, o indora o bricco
E no desprexa o vermo, nè a trabacca;
Sto sô tanto larghè che o rende bello
Quanto o tocca co-a lûxe da sêu gloria,
Che o sascettin trasforma in t’ûn gioiello
E stende de cölöri ûnn-a baldoria.
A-o mezo do cammin da nostra vitta
L’è brûtto avei e stacche senza un scûo;
Senza palanche, amixi, o no se pitta
E andâ a dormî zazzuin o l’è ben dûo.
