O Cicciollâ 1930/Soli mi e ti
| ←A fëa de Santa Luçia | O Cicciollâ de Soli mi e ti |
O paisan ä procescion do Venerdì Santo a Sann-a→ |
| lasciòu inalterâ a grafia do "Cicciollâ". |
I
Mìa che seiann-a serenn-a e ciaea,
quante barchette gh’è za pe-o mâ:
vègni mae bella, vegni voentea,
tûtto mi vêuggo con ti scordâ.
O mâ o l’è carmo, sciù presto andemmo
soli mi e ti:
l’è pronta a barca, a veja e o remmo
dimme de scì!
Son chì che brûxio, che me consûmmo,
per ti, poeta, canto d’amô;
soli mi e ti, vegni, pestûmmo,
per ti mi vivo, m’è bello o sô.
O mâ o l’è carmo, sciù presto andemmo
soli mi e ti:
l’è pronta a barca, a veja e o remmo,
dimme de scì!
Sarpièmo l’ancoa, mettièmo a veja,
andièmo in fêua lontan lontan;
l’Armetta in vista, i Zovi e a Steja.
e finna e creste du Settepan.
O mâ o l’è carmo, sciù presto andemmo
soli mi e ti:
l’è pronta a barca, a veja e o remmo,
dimme de scì!
De baxi e canti l’anima pinn-a
no te diö mai de ritornâ;
saiò o teû scciavo, ti a mae reginn-a,
a mae Sirena, a Dea do mâ!
O mâ o l’è carmo, sciù presto andemmo
soli mi e ti:
l’è pronta a barca, a veja e o remmo,
dimme de scì!