O Cicciollâ 1930/Mugugni d'ûn vêgio
| ←In sciô vestî de donne | O Cicciollâ de Mugugni d'ûn vêgio |
Un gîu pe San-na→ |
| lasciòu inalterâ a grafia do "Cicciollâ". |
O santa Civiltae, santa illusion
D’avëi cô-a Scienza, a Fede e cô-a Morale
Portôu a bestia ümana a perfexion!
O tempo o gïa in to sô ciclo fatale,
E, se credemo de toccâ za o çe
Cö-o cervello, o se torna a andâ inderè.
A guaera a l’è finïa, ma sempre a scienza
Da Natura i segreti a va scrutando
Pe sterminâ d’Adamo a discendenza
In to modo ciù cinico, esecrando:
E in paxe, — sentî questa, a l’è da rïe, __
Gh’è fin chi spende çinqueçento lïe
Pe vede di energumeni rompise
O muro a sangue, con pugni de schêua,
E a speise di mincioin presto arrichise
E arrivâ a gloria, forse a testa vêua,
O pe vedde scannâ di povei tori
Da un espada portôu ai sommi onori!
E presto aviemo o circo, e i delinquenti
Daeti in pasto ai leoin. Pe poei intrâ
Sân prexi matti, e andian pe combattenti
Di dilettanti a fâse buzzarâ
Sotto o pollice verso de scignöe,
Allenae a çerte ciniche demöe.
I gardetti dô giorno andando a schêua
Ciacciaran de knock out, de round, e a guaera
Se preparan cö a boxe. In casa e fêua
Se dan pattoïn vestii fin che so-in taera,
E a-o papà spesso tocca fa o mesté
De l’arbitro con battighe o pané.
Chi va cianin va san e va lontan,
Dixe o proverbio, e invece a rompicollo
Aöa se côre, comme l’arragan;
E chi ciù presto va, spesso, da sciollo,
Arriva co-o recòrd, conto rotondo,
De çento migia a l’oa, all’âtro mondo!
A morale de quanto ho mugugnôu
Ve a digo, e son següo de no inventâla:
A religion, a scienza han innestôu
A pianta umana pe civilizzâla,
Ma là a no tacca, a bêutta sempre viva
Da o çeppo da barbarie primitiva.